Munda turaqty jumys istegim kelmeidi. Maǵan óz kásibim jaqynyraq. Biraq dál osylai asarlatyp jatsa, tegin kómek kórsetýden qashpaimyz. Ánshi Qurmash Mahan Halyqqa qyzmet kórsetý ortalyǵyndaǵy jumysyn osylai qorytty, dep habarlaidy Sputnik Qazaqstan tilshisi.
Búgin Astana jáne Almaty qalalarynda "Qazaqstan daýysy" baiqaýynyń jeńimpazy Shahrizat Seidahmet, ánshi Aijan Nurmaǵanbetova, Qurmash Mahan men Myrzahan Mahan, prodiýser Qydyráli Bolman jáne "Habar" arnasynyń telejúrgizýshisi Ǵani Ótepbaiuly Halyqqa qyzmet kórsetý ortalyqtarynda jumys istep, halyqpen jumys isteýdiń qanshalyqty qiyn ekenderin aityp berdi.
"Jumys unaǵanymen, ishki zańdardy bilmei qinalyp jatqan jaiym bar. Sol sebepti, aldyn ala daiyndyq kerek eken dep qorytyndy shyǵardym. Biraq qyzmet túrlerin tolyq meńgerip alý úshin 2 kún jetkilikti dep oilaimyn. Ekinshiden, adamdarmen jumys isteý óte qiyn eken. Kóp adam sabyrsyz ári tártip saqtai bermeidi. Onyń ústine asyǵyp júrip, qyzmet túrlerin tez alǵylary keletini taǵy bar. Al jalpy jumys unap jatyr. Halyqqa qyzmet kórsetý ortalyǵy qyzmetkerleriniń jumysy qanshalyqty qiyn ekenin túsingendeimin", — deidi "Habar" arnasynyń telejúrgizýshisi Ǵani Ótepbaiuly.
Ánshi Qurmash Mahan da elektrondy qyzmet túrlerin qalai kórsetý kerektigin birden meńgere almaǵandyǵyn aitady. Sondai-aq, ol bul qyzmetke qaraǵanda sahnada óner kórsetýdiń ońai ekenin aityp ótti.
"Mundai jumysty birinshi ret jasap turǵandyqtan, sál túsine almai jatyrmyn. Sol sebepti, maǵan qanshalyqty unaǵanyn naqty aita almaimyn. Dese de, ózime kerekti biraz paidaly aqparat jinap alǵan siiaqtymyn. Qyzmetkerlerdiń jumysy, rasymen, ońai emes eken. Barlyǵynyń birdei kóńilinen shyǵý múmkin emes dep oilaimyn. Halyq suraqtarynan bólek ózderimen birge úidegi qiyndyqtaryn da arqalap keledi. Al munda turaqty jumys isteý máselesine kelsek, óz kásibim ózime jaqynyraq. Biraq búgingidei asarlatyp jatsa, kómek kórsetýden qashpaimyz. Sondai-aq, bizge bul jarnama úshin eshqandai aqsha tólenbeitinin aita ketkim keledi", — deidi ánshi.
Al Qydyráli Bolmanov kerisinshe bul jumysyna birden úirenisip ketkenin aitty. Muny qujattarǵa bailanysty Halyqqa qyzmet kórsetý ortalyǵyna jii kelýimen bailanystyrdy. Sondai-aq, ol halyqty qyzmetkerlerge túsinistik tanytýǵa shaqyrdy.
"Aldyma kelgen halyqqa zańdy tulǵany esepke alý, esepten shyǵarý jáne qujattarǵa qol qoiý syndy qyzmet túrlerine bailanysty kómek kórsetip jatyrmyn. Ár adamnyń qyzmetti tez alǵysy keletinin de jaqsy túsinip otyrmyn. Olarǵa qolymnan kelgenshe kómek kórsetip, qujattarǵa bailanysty qiyndyqtaryn sheshýge qol ushymdy sozýǵa ázirmin. Bir ai buryn ózim de osy jerge kelip kóligimdi tirketip, qujattaryn alyp edim. Endi mine ózgelerge kólik nómirlerin úlestirip jatyrmyn. Qalai desek te, bul úlken jaýapkershilikti talap etetin qyzmet. Halyqtyń qujatqa qatysty qiyndyǵyn sheship qana qoimai, kóńil-kúilerine sai jaýap qaiyra bilýiń qajet. Jalpy osy jerdegi jumystyń qanshalyqty qiyn ekenin túsindim", — deidi ol.
Ánshi Shahrizat Seidahmet bolsa, qyzmetkerlerge sabyr tiledi. Jumys qiyn bolmasa da, júikeni tozdyratynyn aityp ótti.
"Munda qyzmetkerler árbir aitatyn sózderine abai bolýlary kerek. Birnárseni durys jasamasa, halyqtyń kóńilinen shyqpai qalsa, jep otyrǵan nandarynan aiyrylyp qalýlary múmkin. Eń bolmasa myń adamnyń ishinde bir adam bolyp osy jerdegi qyzmetkerlerdiń jan dúniesin túsinip ketkim keldi. (…) Aiǵai-shýdyń basy-qasynda bolǵan kezderim de bar. Arada biraz ýaqyt ótken soń adamdar munda kelýin de qoiatyn shyǵar. Bizdiń balalarymyz budan da rahat ómir súredi dep oilaimyn. Osylai jalǵasa berse, jumys jeńildep, júikeniń juqarýy azaiatyn edi. Osy jerdegi qaryndastarymyzǵa sabyr bersin", — dedi ánshi.
