«Aqjol» partiiasynyń atynan kezekten tys prezidenttik sailaýǵa túsken Daniia Espaeva saiasi naýqannyń aldyn ala qorytyndysynan keiin óz pikirimen bólisti, dep habarlaidy "Ult aqparat".
«Aldymen, barsha qazaqstandyqtardy elimizdiń tarihynda mańyzdy bolyp tabylatyn aitýly kúnniń sátti ótýimen quttyqtaimyn. Onyń ishinde, meni qoldap daýys bergen otandastaryma sheksiz alǵysymdy aitamyn. Búgindikke uialy telefonyma qońyraý shalyp, qoldaý bildirýshilerdiń sanynda shek bolmady. Sondai-aq, óz partiialastarym - aqjoldyqtarǵa rizashylyǵymdy bildiremin. Sailaýǵa kelsek, óte tartysty ótti. Sońǵy nátijeni erteń biletin bolamyz», - dedi D. Espaeva.
Sonymen qatar kandidat sailaýǵa qatysýdan ómirlik jáne qyzmettik tájiribe jinaǵanyn aityp ótti.
«Sailaý - men úshin úlken mektep boldy. Óz basyma kerekti dúnie jinadym. Ásirese, óńirlerdegi halyqpen kezdesý barysynda kóptegen málimetterge qol jetkizdim. Aldaǵy ýaqytta maǵlumattarmen tereńinen tanysatyn bolamyn. Al nátijege kelsek, aldyn ala qorytyndy boiynsha, 3-oryndamyn. Ol - men úshin úlken kórsetkish. Odan bólek, táýelsiz Qazaqstan tarihynda prezidenttikke kandidattar arasynda alǵash áiel bolyp qaldym. Bul qýantady», - dedi ol.
Kandidattyń sailaý shtabynda onyń ókilderi men qoldaýshylary jinaldy.
Exit-poll nátijesine súiensek, «Qoǵamdyq pikir» institýtynyń ókilderi júrgizgen saýalnamaǵa sáikes, prezidenttik sailaý barysynda Daniia Espaevaǵa elektorattyń 5,32 paiyz daýys berdi. Al «Jastar» ǵylymi-zertteý ortalyǵynyń saýalnama qorytyndysy boiynsha, D. Espaevaǵa halyqtyń 4,78 protsenti qoldaý bildirgen.
