© Sputnik / Vladislav Vodnev
Vitse-premer Eraly Toǵjanov Úkimet jumysyna "jaqsy" degen baǵa berdi, dep habarlaidy Sputnik Qazaqstan.
Úkimet kýlýarynda jýrnalister Toǵjanovtan eski Úkimetpen jańa Qazaqstandy qalai qurýǵa bolatynyn jáne ministrler kabinetiniń jumysyn qanshaǵa baǵalaitynyn surady.
"Jańa Úkimette basqa jaqtan kelgen adamdar otyrýy kerek dep oilaisyzdar ma? Meniń oiymsha, qazir Úkimet jaman jumys istep jatqan joq. Bes baldyq shkala boiynsha úkimet "tórtke", iaǵni jaqsy jumys istep jatyr", - dep jýap berdi Toǵjanov úkimet kýlýarynda.
Ótken jeksenbi, besinshi maýsymda Qazaqstanda jalpyhalyqtyq referendým ótti. Qazaqstandyqtardyń basym bóligi Konstitýtsiiaǵa túzetýlerdi qoldap daýys berdi.
Buǵan deiin Memleket basshysy referendým arqyly halyq el taǵdyryn sheshetinin, jańa Qazaqstandy qurýǵa qadam jasaitynyn aitty. Dese de áleýmettik jelide qazaqstandyqtar qazirgi Úkimettiń quramyn jii synǵa alady. Jurtshylyqtyń pikirinshe, jańa Qazaqstan qurý úshin saiasi reformalar jetkiliksiz, biliktegi sheneýnikter de tolyǵymen jańarýy kerek.
