Foto: polisia.kz
Elordadaǵy saýda úilerdiń birinde urlyq jasaǵan adam beinebaqylaý kameralarynyń kómegimen ustaldy, dep habarlaidy Ult.kz.
Astana qalasy PD baspasóz qyzmetiniń habarlaýynsha saýda úilerdiń birinde belgisiz er adamnyń óziniń eski kúrtesin sheship, dúkenniń jańa kúrtesin kiip, syrtynan óz kúrtesin qaita jamylyp, oqiǵa ornynan izin sýytqany málim boldy.
Osylaisha jábirlenýshige 80 myń tenge kóleminde shyǵyn keltirgen. Dúken qyzmetkerleri taýardyń joǵalǵanyn anyqtap, politsiiaǵa júgindi.
Baiqońyr aýdandyq kriminaldyq politsiia qyzmetkerleri kúdiktini beinebaqylaý kameralarynyń kómegimen anyqtap, jedel túrde qolǵa túsirdi. Qazirgi ýaqytta kúdiktige qatysty qylmystyq is qozǵalyp, tergeý amaldary júrgizilýde.
Astana qalasy Politsiia departamenti saýda nysandarynyń qaýipsizdigin qamtamasyz etý úshin azamattarǵa adaldyq tanytyp, zańdy buzbaýǵa shaqyrady. Sonymen qatar, saýda ortalyqtarynyń basshylaryna qaýipsizdik júielerin kúsheitýdi jáne taýarlardyń saqtalýyn qamtamasyz etýdi usynady.
