Bes jylda 213 myńnan astam eski kólikti joiýǵa tapsyrdy. Bul týraly «ÓKM Operatory» JShS baspasóz qyzmetinen málim boldy, dep habarlaidy QazAqparat.
«Eski kólikterdi joiýǵa qabyldaý baǵdarlamasyna 5 jyl boldy. Osy aralyqta qazaqstandyqtardan 213 983 kólik joiýǵa qabyldandy. Atap aitqanda, onyń 193 298-i jeńil kólik, 8 027 avtobýs jáne 12 658 júk kóligi. Tozyǵy jetken kólikterin joiýǵa ótkizgen azamattarǵa 31,9 mlrd teńgeden astam qarajat tólendi. Sertifikat baǵdarlamasy boiynsha 54 831 avtokólik qabyldandy. Atalǵan baǵdarlamanyń nátijesinde qazaqstandyqtar otandyq óndirýshiden 29 759 jańa avtokólik satyp aldy», - delingen taratylǵan málimette.
Sondai-aq eskirgen aýyl sharýashylyǵy tehnikasyn jeńildik sertifikatyna aiyrbastaý baǵdarlamasy boiynsha 3 045 agrotehnika joiýǵa tapsyryldy. Onyń 801-i kombain bolsa, 2 244 -i traktor.
2021 jyly aýyl sharýashylyǵy tehnikasyn qabyldaýǵa 2 380 kvota bólindi. Keiin QR Investitsiialar jáne infraqurylymdyq damý ministrligi men Ekologiia, geologiia jáne tabiǵi resýrstar ministrligi kelisimimen qosymsha taǵy 1000 kvota bólingen bolatyn (580 traktorǵa, 420 kombainǵa).
Esterińizge salaiyq eski kólikti joiýǵa qabyldaý baǵdarlamasy 2016 jyldyń 21 qarashada bastalǵan bolatyn.
Al aýyl sharýashylyǵy tehnikasyn qabyldaý baǵdarlamasy 2020 jyldyń 2 qarashasynan bastap iske qosyldy. Baǵdarlama aiasynda agrotehnikany tapsyrýshylarǵa 560 myńnan 2 million teńgege deiin jeńildik sertifikaty beriledi. Al jeńil avtokólikterge 210 myń, jolaýshy jáne júk kólikteriniń sanatyna qarai 420 myńnan 630 myń teńgege deiin baǵalanady.
Eski kólikterdi joiýǵa qabyldaý baǵdarlamasy boiynsha aimaqtardan jinalǵan mashinalar Qaraǵandy oblysyndaǵy zaýytqa jetkiziledi. Isten shyqqan kólik quraldary sol jerde qaita óńdeledi. Qazirgi tańda zaýyt 194 462 kólikti qaita óńdedi.
