videodan alynǵan kadr
Májilismen Ermurat Bápi Bas prokýrorǵa depýtattyq saýal joldap, "Kamenka" asyl tuqymdy mal zaýytynyń ujym múshelerine paiǵa berilgen jerdi qaitarýdy talap etti, dep habarlaidy Sputnik Qazaqstan.
"Biz – depýtattar myna jaqta aq ter-kók ter bolyp, Qazaqstan halqynan urlanǵan, talan-tarajǵa túsken aktivterdi elge qaitarýǵa qatysty zańdy qabyldap júrgende, Almaty jaqta "eski" Qazaqstannyń Nazarbaevtan qalǵan jebirleri men jemqorlary qarapaiym halyqty qanaýdy jalǵastyryp jatyr. Naqtylap aitqanda, Nurbol Bolatuly Nazarbaev, Qairat Satybaldy men Ahmetjan Esimovtiń nókerleri jáne "qańtar generaly" Serik Kúdebaev Almaty oblysynyń Qarasai aýdanyna qarasty burynǵy "Kamenka" asyl tuqymdy mal zaýytynyń ujym múshelerine paiǵa berilgen jerdi kópe-kórneý tartyp alǵan", - dedi Bápi búgingi Májilis otyrysynda.
Onyń aitýynsha, paishylardyń 274 gektar jeri zańsyz jaýapkershiligi shekteýli seriktestikterge rásimdelgen. Odan keiin eki myńnan astam adamnyń úlesin "IJS"-ke ainaldyryp, onyń edáýir bóligin satyp jibergen. Olarǵa Almaty oblysy men Qarasai aýdanynyń prokýratýrasy da kómektese almapty.
"Tartyp alynǵan jerdiń biraz bóligin general Kúdebaevtyń adamdary, Ahmetjan Esimovtyń adamdary, sodan keiin "Elit stroi" – Áliia Nazarbaeva, "Qazaq stroi" – Sergei Mýliar, Dmitrii Li degen adamdarǵa, solardyń kásiporyndaryna taratyp bergen, álde satqan. Jergilikti prokýratýra men politsiia zarlaǵan halyqtyń emes, toiymsyz, tajal klannyń múddesin qorǵaýda", - dep atap ótti depýtat.
Bápidiń sózine qaraǵanda, paishylarǵa arasha túsken advokat Lázzat Japashevany jáne burynǵy "Kamenka" asyl tuqymdy mal zaýyty qyzmetshileri kooperativiniń tóraiymy Ámina Jeńisbekovany "alaiaqtyq jasady" degen jalǵan aiyppen eki aiǵa qamatyp tastaǵan. Al paishylardyń narazylyq shaǵymyn joǵarǵy organdarǵa ujym atynan jetkizip, aryzdanyp júrgen Abylai Qoja degen jigitti úiinen ustap áketip, abaqtyǵa tyqqan.
Qazirgi kezde paishylar 274 gektardyń jartysyn memleketke qaitarýǵa kelisken. Ózderine jartysyn ǵana qaldyrýdy surapty. Olar ereýilge shyǵýǵa daiyn otyr.
"Bul másele ádiletti túrde sheshilýi úshin jer daýyn aiaqsyz qaldyrmaimyn! Eger is taǵy da nazarbaevshyl adamdardyń múddesine sheshilip, jer ieleri zarlap qalatyn bolsa, el prezidentine deiin baramyn!", - dedi Bápi.
Depýtat barlyq qujattyń kóshirmesin Bas prokýrorǵa joldamaqshy.
