Eskendir Súleimenov qaza bolǵan jol apatyna kináli dep tanylǵan Malika Muhitova búgin qamaýǵa alynady, dep habarlaidy "Ult aqparat".
Esil aýdandyq №2 sotynyń sýdiasy Qanat Tobaǵaliulynyń aitýynsha, zań boiynsha búgin tiisti qaýly túsýi kerek. Sodan bastap kináli adamdy qamaýǵa alý sharalary bastalady.
«Kúni keshe ǵana M.Muhitovaǵa qatysty alǵashqy sottyń úkimi ózgerissiz qaldy. Ol jaiynda buqaralyq aqparat quraldary da jazdy. Buǵan deiin Muhitovany qamaýǵa alý týraly sheshim shyǵarylǵan bolatyn. Alaida sottyń úkimi zańdy kúshine enýi tiis. Keshe appeliatsiialyq instantsiianyń sheshimimen sottyń úkimi zańdy kúshine endi. Demek, búginnen bastap kináli azamatty qamaýǵa alý sharalary qolǵa alynýy shart. Qaýly túsken boida biz atalǵan qujattyń kóshirmesin tiisti organdarǵa jiberetin bolamyz. Sol kezde M.Muhitovany tergeý abaqtysyna, odan keiin koloniiaǵa jiberedi. Atalǵan túrme minimaldy qaýipsizdik deńgeii bar mekemelerge jatady», - dedi Q.Tobaǵaliuly Astanada ótken baspasóz máslihatynda.
Eske salaiyq, 2018 jyldyń maýsym aiynda Astanada jol apatynan aqyn Oljas Súleimenovtiń 26 jastaǵy jieni Eskendir Súleimenov mert boldy. Eskendir tizgindegen mototsikl qiylysqa shyqqan kólikke soǵyldy. Arada kóp ótpei Astana qalalyq Ishki ister departamenti apatqa sebepker bolýy múmkin Hyundai avtokóliginiń iesi, 29 jastaǵy Malika Muhitovaǵa qatysty tergeý amaldary júrip jatqanyn habarlady. Keiinnen M.Muhitova Qyzylorda oblystyq IID (Politsiia departamentiniń) bastyǵynyń qyzy ekeni anyqtaldy.
Atalmysh is boiynsha sot protsesi 12 qazanda bastaldy.
