Astanada jol apatynan kóz jumǵan Eskendir Súleimenovtiń ata-anasy aiyptalýshy Malika Muhitovadan materialdyq shyǵyn óteý týraly talap-aryzdy qaitaryp aldy, dep habarlaidy Sputnik Qazaqstan.
Astana qalalyq ekinshi sotynda Súleimenovter otbasynyń qorǵaýshysy Damir Sandinov tiisti qoldaýhatty oqyp berdi.
"24 qazanda bolǵan sot otyrysynda zardap shekken taraptyń ókili sottalýshy Muhitovadan múliktik shyǵyndy óteý týraly azamattyq talap-aryz bergen edi. Qazaqstan Qylmystyq kodeksiniń 169-baby 1-tarmaǵyna sáikes azamattyq talapker qylmystyq protsestiń kez kelgen kezeńinde talap-aryzdy qaitaryp alýǵa quqyly", — dedi advokat.
Qorǵaýshy sýdiadan zardap shekken taraptyń materialdyq shyǵyndy óteý týraly azamatyq talap-aryzyn qaramaýdy ótindi.
Buǵan deiin zardap shekken tarap sottalýshy Malika Muhitovadan 14 million 753 myń teńge mólsherinde múliktik shyǵyndy óteýdi talap etken edi.
Keiinirek, marqumnyń anasy Leila Súleimenova sýdia Qanat Tobaǵaliuly materialdyq shyǵyndy kórsetýdi talap etkenin aitty.
Aita keteiik, is boiynsha prokýror Á.Baraev sottan aiyptalýshyny 2 jylǵa bas bostandyǵynan aiyrýdy surady.
«Eskendir Súleimenovtiń Uly Dala kóshesiniń qiylysyn baǵdarshamnyń jasyl túsi janyp turǵan kezde ótpek bolǵany anyqtaldy. Myna jaiǵa mán bere ketý kerek: ol (Súleimenov - avt.) kóshe qiylysynyń 80 paiyzyn ótip, qozǵalysyn aiaqtaýǵa jaqyn qalǵan (...) Júrgizýshi kóligimen solǵa burylý kezinde qarama-qarsy baǵytta kele jatqan kólik quralyna jol berýi kerek», - dedi prokýror búgingi sot otyrysynda.
Aiyptaýshy óz sózinde sot otyrysynda aiyptalýshy Muhitovanyń QR QK-niń 345-baby 3-shi bóligi (kólik quraldaryn basqaratyn adamdardyń jol júrisi nemese kólik quraldaryn paidalaný qaǵidalaryn buzýynan abaisyzda adam ólimine ákep soqqan is-áreket) boiynsha kinási dáleldengenin atap ótti.
«Qurmetti sot, jazalaý máselesin sheshe otyryp, ádiletti jaza túrin aiqyndaý úshin barlyq faktiler eskerilýi kerek degen oidamyn. QR Qylmystyq kodeksiniń 53-shi jáne 54-shi baptaryna sáikes, aiyptalýshynyń jazasyn jeńildetetin jáne aýyrlatatyn jaittardyń bári eskerilýi tiis. Jeńildetetin tusqa aiyptalýshynyń qylmysty birinshi ret istep otyrǵanyn, isine ókinetindigin jatqyzýǵa bolady. Al jazany aýyrlatatyn tusty aiyptaýshy tarap kórip otyrǵan joq. Osylardyń bárin eskere kele, Malika Muhitovany QR Qylmystyq kodeksiniń 345-baby 3-bóligi boiynsha kináli dep taýyp, eki jylǵa bas bostandyǵynan aiyrý, kólik quralyn basqarý quqyǵynan úsh jyl merzimge aiyrý jazasyn taǵaiyndaý suralady», - dedi prokýror.
Prokýror aiyptalýshy jazasyn qylmystyq-atqarý júiesiniń minimaldy qaýipsizdik mekemesinde óteýi kerektigin surady.
Eske sala ketsek, belgili aqyn, jazýshy Oljas Súleimenovtiń nemeresi 27 jastaǵy Eskendir Súleimenov Astanada jol apatynan kóz jumǵan edi. Jol apaty Máńgilik el – Kerei Jánibek handar kósheleriniń qiylysynda bolǵan. Jas jigit mototsikl júrgizip kele jatqan. Eskendir Súleimenovti Qyzylorda oblysy ishki ister departamentiniń bastyǵy, politsiia polkovnigi Qairat Muhitovtiń qyzy Malika Muhitova qaǵyp ketken. 29 jastaǵy Malika Muhitova ótken aptada ótken sot otyrysynda marqumnyń ata-anasynan jylap keshirim surady. Óziniń kinásin tolyǵymen moiyndap, zardap shekken tarapqa materialdyq shyǵyndy tóleýge daiyn ekenin málimdedi.
Aitýynsha, kólikti 2012 jyldan beri júrgizedi, alty jyl ishinde birde bir ret jol-kólik oqiǵasyna ushyramaǵan.
Aiyptalýshy "Samuryq-Qazyna" ulttyq kompaniiasynda jumys isteidi, turmys qurmaǵan, buryn sottalmaǵan.
