Jyl basynan beri 2,5 myńǵa jýyq esirtki qylmysy anyqtaldy. Bul týraly Ishki ister ministrligi Esirtki qylmysyna qarsy is-qimyl departamentiniń basqarma basshysy Baqytjan Ámirhanov aitty, dep habarlaidy QazAqparat.
«Esirtki men nashaqorlyq qoǵamdy qatty alańdatyp otyr. Elimizdegi ahýalǵa 3 negizgi faktor áser etedi. Birinshiden, Ortalyq Aziia, Qazaqstan, Resei memleketteri arqyly ótip, ári qarai Eýropaǵa aparatyn «Soltústik baǵyt» boiynsha aýǵan geroininiń trafigi bar. Ekinshiden, sintetikalyq esirtkilerdiń keń taralý qaýpi bar. Úshinshiden, elimizdiń ońtústik óńirlerinde (Shý alqaby jáne Qyzylorda oblysy) kannabisten jasalatyn esirtkiniń túrleri bar», - dedi Ámirhanov Ortalyq kommýnikatsiialar qyzmetinde.
Onyń aitýynsha, jyl basynan beri barlyq quqyq qorǵaý jáne arnaiy organdar birlesip 2,5 myńǵa (2168-in IIM anyqtady) jýyq esirtki qylmysyn anyqtady. Onyń 60 paiyzy (1,5 myń) esirtki satý qylmysyna qatysty.
«Jalpy, 12,7 tonna esirtki tárkilendi. Osy oraida esirtkinin negizgi túrlerine toqtalsaq, geroin – 33 keli, apiyn – 68 keli, sintetika – 507 keli, gashish – 705 keli, marihýanna 4 tonnadan astam bolsa, qalǵany esirtkiniń basqa da túrleri», - dedi basqarma basshysy.
Onyń sózine qaraǵanda, 4 uiymdasqan qylmystyq toptyń áreketi áshkere boldy. Sonyń ishinde uiymdasqan qylmystyq toptyn 32 belsendi múshesi quryqtaldy. Olar 13 asa aýyr esirtki qylmysyn jasaǵany úshin aiyptaldy.
