Soltústik Qazaqstan oblysynda esirtki tutynyp, zańsyz jolaýshy tasymalymen ainalysqan kólik júrgizýshisi 15 táýlikke qamaýǵa alynýy múmkin, dep habarlaidy "Ult aqparat".
SQO politsiia departamenti baspasóz qyzmetiniń málimetinshe, aýdan ortalyǵy Taiynshada patrýldik politsiia qyzmetkerleri qolynda ruqsat qujattary bolmasa da jolaýshy tasymaldap júrgen Folksvagen golf avtomobiliniń júrgizýshisin toqtatqan. 32 jastaǵy jergilikti turǵyn meditsinalyq kýálandyrýdan ótti. Nátijesinde onyń esirtki tutynǵany anyqtaldy. Material sotqa jiberiledi, quqyq buzýshy 15 táýlikke ákimshilik qamaýǵa alynýy jáne aldaǵy 7 jylda kólik quralyn basqarýǵa tyiym salynýy múmkin.
SQO-da 20-22 qańtar kúnderi politseiler «Avtobýs» jedel-profilaktikalyq is-sharasyn ótkizdi. Onyń maqsaty - jolaýshylar tasymaly qaýipsizdigin qamtamasyz etý. Tártip saqshylary avtobýs jáne taksi júrgizýshilerin nazarǵa aldy.
«Úsh kún ishinde olardyń tarapynan 241 zań buzýshylyq tirkeldi. 21 qańtarda Petropavlda eki avtobýs júrgizýshisi ákimshilik jaýapkershilikke tartyldy. Olar Nazarbaev jáne Chkalov kóshelerinde belgilengen jerden joldan ótpek bolǵan jaiaý júrginshilerge jol bermegen. Jaiaý júrginshiler ótkeline jaqyndaǵanda, sheshim qabyldaýǵa ýaqyt qaldyrý úshin jyldamdyqty báseńdetý kerektigin eske salamyz», - deidi SQO PD jergilikti politsiia qyzmeti basqarmasynyń bastyǵy Aidyn Baimatov.
Sondai-aq, politseiler manevr jasaý erejelerin buzýdyń 44 faktisin ashty. Kólik júrgizý kezinde telefonmen sóilesken 46 júrgizýshi anyqtalyp, 16-sy josparly tekserýden óte almady, 9-y jyldamdyqty asyrǵan. Avtobýs parkiniń úsh laýazymdy tulǵasy baǵdarǵa tehnikalyq aqaýy bar kólikterdi shyǵarǵany úshin jaýapqa tartyldy.
