Atyraýda esirtkige eltigen kúiinde kólik basqaryp, psihotropty dári saqtaǵan ózbekstandyq áiel 6 balasymen el aýmaǵynan shyǵaryldy, - dep habarlaidy "Ult aqparat" Polisia.kz-ke silteme jasap.
Esirtkige mas kúide kólik basqaryp, qol sómkesinde 34 dana ártúrli psihotroptyq dári-dármek saqtaǵan 30 jastaǵy Ózbekstan azamatshasyna qatysty QR ÁQBtK-niń 608-babymen ákimshilik hattama toltyrylyp, is-qujattar ákimshilik sotqa joldanǵan bolatyn. Tekseris barysynda tártip saqshylary 30 jastaǵy sheteldik azamatsha men onyń 6 balasynyń qujatsyz júrgenin anyqtaǵan.
Sheteldik áiel Atyraý qalasyna 2013 jyly kelip, jeke basyn anyqtaityn qujattaryn joǵaltyp alǵan. Sonymen qatar 7, 5, 3, 2, 1 jastaǵy jáne 2022 jyly týǵan balalarynyń da qujattary bolmaǵan. Osylaisha, Atyraý qalalyq Politsiia basqarmasynyń kóshi-qon qyzmeti bóliminiń qyzmetkerleri Atyraý qalalyq perzenthanasynan kámeletke tolmaǵan alty balaǵa týý týraly anyqtama alyp, Ózbekstan Respýblikasynyń Elshiligine atalǵan áieldi eline qaitarý úshin beriletin kýálikti alyp berýge yqpal etip, tiisti zańdy kómek kórsetti.
Atyraý qalasy boiynsha ákimshilik quqyq buzýshylyqtar jónindegi mamandandyrylǵan sotynyń qaýlysymen 30 jastaǵy Ózbekstan Respýblikasynyń azamatshasy alty balasymen QR aýmaǵynan tysqary shyǵaryldy.
