"Samuryq-Qazyna" qorynyń basshysy Axmetjan Esimov shetelde qordyń aktivterine arest salý máselesin kóterdi, dep xabarlaidy QazAqparat tilshisi.
"Ókinishke qarai, aktivterdiń buǵattalýyna bailanysty qordy sheteldik iýrisdiktsiialardaǵy sot protsesterine udaiy tartý praktikasy beleń alyp barady. Atap aitqanda, 2017 jyly Stati talaptary boiynsha qorǵa tiesili quny 5 milliardtan astam AQSh dollaryn quraityn Qashaǵan aktsiialaryna shekteý qoiyldy. Al 2018 jyly Aqtaý Petroldyń respýblikaǵa qoiǵan talaptary boiynsha qorǵa tiesili quny 38 millionnan astam AQSh dollaryn quraityn Túrkiiadaǵy Shekerbank aktsiialaryna tyiym salyndy. Ony bárińiz jaqsy bilesizder. Qordyń aktivterine tyiym salý qaýpi jalpy bizdiń aktivterimizdiń investitsiialyq tartymdylyǵyna aitarlyqtai jaǵymsyz áser etýde", - dedi A.Esimov Úkimettiń búgingi otyrysynda.
Osyǵan bailanysty qor basshysy arnaiy mexanizmdi tezdetip engizýdi usyndy. Sonyń arqasynda qordyń aktivterin qorǵaýǵa bolady.
"Buny men tek Roman Vasilevichke (QR Indýstriia jáne infraqurylymdyq damý ministri - avt.) ǵana emes, basqa da jigitter osy máseleniń biz úshin qanshalyqty mańyzdy ekenin jaqsylap túsinsin degenim ǵoi. Osyǵan bailanysty biz ádilet jáne qarjy ministrlikterinen Qazaqstan Respýblikasyna qarsy shyǵarylǵan xalyqaralyq protsester boiynsha sheshimderdi oryndaý mexanizmin ázirleýdi usynǵan edik. Ondai mexanizm bolsa, ol arqyly Ulttyq qordyń, kvazimemlekettik sektordyń aktivterine tyiym salýdan qorǵanýǵa bolady", - dep atap kórsetti A.Esimov.
Sondai-aq, ol «Taý-Ken Samuryq» kompaniiasyn kúsheitýdi usynyp otyr.
«Biz buny kezinde Elbasyna usynǵanbyz. Ózińiz de jaqsy bilesiz, Asqar Uzaqbaiuly (QR Premer-Ministri - avt.). Bul - «Taý-Ken Samuryq»-tyń negizinde satylmas biriktirilgen keshen qurý máselesi. Qor taý-ken jáne metalýrgiialyq salany keshendi damytý, onyń ishinde geologiialyq barlaý jáne ǵylymi-texnikalyq áleýetti arttyrý múmkindikterin qarastyrýda. Ol úshin Qazgeologiia, Metallýrgiia jáne ken baiytý institýty, sondai-aq, ERG aktsiialarynyń memlekettik paketi siiaqty aktivterdiń áleýetin «Taý-Ken Samuryq» kompaniiasyna berý jolymen shoǵyrlandyrýdy talap etedi», - dedi A.Esimov Úkimettiń búgingi otyrysynda.
