«Qazgidromet» RMK elordadaǵy Esil ózeninde balyqtardyń erekshe qubylysyn tekserý maqsatynda synamalar alyp, sý sapa standarttaryna sáikes kelmeitinin anyqtady, dep habarlaidy "Ult aqparat".
«Qazgidromettiń» astanalyq mamandary balyqtardyń jappai sý betine shyǵýyn anyqtaý úshin Esil ózeniniń úsh jerinen synama alǵan bolatyn. Birinshi kúnniń taldaý nátijelerinde normadan aýytqýlar tabylmady. Sýdyń sapasyna taldaý 42 fizika-himiialyq kórsetkish boiynsha júrgizilýde.
Keiin, ottegini himiialyq tutyný 37,1-47,2 mg/dm3 mólsherinde ekeni anyqtaldy. Bul - shekti normadan 1,1-1,3 esege kóp. Mundai jaǵdai sýǵa synama alynǵan barlyq núktede baiqalǵan.
«Aqparat QR Ekologiia, geologiia jáne tabiǵi resýrstar ministrliginiń Ekologiialyq retteý jáne baqylaý komitetine jiberildi», - delingen «Qazgidromet» aqparatynda.
Endi, 31 mamyrda 5 táýlik ishinde daiyn bolatyn «ottegini biohimiialyq tutyný (5)» synamasynyń nátijesi jariialanatyn bolady.
