Dúniejúzilik sýdy monitoringileý jáne taldaý kúnine orai Ekologiia, geologiia jáne tabiǵi resýrstar ministrligi Esil ózenindegi sýdan synama alý protsesin kórsetti, dep habarlaidy QazAqparat.
«Qorshaǵan ortanyń lastanýyn synaý zerthanasy Esil ózeninen sý synamasyn aldy. Synama alý kezinde temperatýra ólshenedi, sodan keiin synama zerthanaǵa jetkizilip, organikalyq quramy, aýyr metaldardyń bolýy, tuzdyń quramy zertteledi», - dedi «Qazgidromet» RMK qorshaǵan ortanyń lastanýynyń monitoringi synaq zerthanasynyń basshysy Erbol Orazalin.
Onyń aitýynsha, sýdyń sapasyn osylai baqylaý jumysy ai saiyn júrgiziledi.
«Nur-Sultanda biz baqylaityn jeti sý qoimasy jáne synama alatyn 20 oryn bar. Bizdiń sý aidyndary eń taza sý aidyny emes ekenin moiyndaýymyz kerek, biraq ruqsat etilgen shekti kontsentratsiia mólsherden asyp ketpeitinin de aita ketken jón. Biz birneshe jyldan beri Esil ózenine monitoring júrgizip kelemiz jáne sý quramynda aitarlyqtai ózgerister bolǵan joq», - deidi ol.
Erbol Orazalin sý quramy ne sebepti aitarlyqtai ózgermegeni týraly da málim etti.
«Bizde sýdy qatty lastaityn iri zaýyttar men kásiporyndar joq. Eger sý quramyndaǵy keibir kórsetkishter qalyptan asyp ketse, onda biz aqparatty Tótenshe jaǵdailar departamentine, Nur-Sultan ákimdiginiń Ekologiia departamentine jiberemiz. Olar sý quramyn qalypqa keltirý josparyn ázirlep, problemalyq núkteni taýyp, taldaý júrgizedi. Biraq men taǵy da qaitalaimyn, Esil ózeninde shamadan tys kórsetkish bolyp kórgen joq», - deidi ol.
Mekemeniń baspasóz qyzmeti habarlaǵandai, «Qazgidromet» RMK elimizdiń 143 sý obektisinde ornalasqan 424 núktesinde, onyń ishinde 93 ózende, 31 kólde, 15 sý qoimasynda, 3 arna jáne 1 teńizde sýdyń sapalyq jai-kúiine baqylaý júrgizedi.
