Foto: Pixabay
Densaýlyq saqtaý ministrligi ókilderi meditsinalyq kómek kórsetý qaǵidalaryna engiziletin ózgeristerge, atap aitqanda, jedel járdem jumysy týraly qaýly jobasyna qatysty taǵy da túsinikteme berdi.
Densaýlyq saqtaý ministrliginiń resmi ókili Áigerim Orazalieva birqatar BAQ-ta jedel meditsinalyq kómek kórsetý qaǵidalaryna ózgerister engizý týraly qaýly jobasynyń mazmuny qate túsindirilgenin atap ótti.
Resmi ókildiń sózinshe, jedeldikti jaqsartý úshin jumys ýaqytynda shuǵyldyqtyń IV sanatyndaǵy shaqyrtýlarǵa qyzmet kórsetýge meditsinalyq-sanitariialyq alǵashqy kómektiń mobildik brigadalary tartylady.
"Osyǵan bailanysty biz túsindiremiz: burynǵydai 103 nómirine qońyraý shalý arqyly barlyq patsient shaqyrtý sanatyna qaramastan tolyq kólemde meditsinalyq kómek alady. Keshki jáne túngi ýaqytta, sondai-aq demalys kúnderi barlyq sanattaǵy shaqyrtýǵa jedel kómek brigadalary qyzmet kórsetedi. Osylaisha, halyq úshin eshteńe ózgermeidi, birde-bir shaqyrtý nazardan tys qalmaidy jáne patsientterge qyzmet kórsetýdiń jedeldigi men sapasy odan ári jaqsarady", - dedi DSM resmi ókili Áigerim Orazalieva.
Aita keteiik, buǵan deiin Densaýlyq saqtaý ministrligi shuǵyl meditsinalyq kómek kórsetý erejelerine ózgerister men tolyqtyrýlar engizilgen qaýly jobasyn ázirlegenin jazǵan edik. Qujat "Ashyq NQA" portalynda jariialandy.
Keiin jedel járdem qyzmetine qatysty halyq arasynda túsinpeýshilik týǵandyqtan DSM ókilderi jedel járdem qyzmetine engiziletin ózgeristerge pikir bildirdi.
