Foto: Akorda.kz
Prezident «Turan» jáne «Ońtústik-Shyǵys» gaz jylý stantsiialarynyń, sorǵy-súzgi stantsiiasynyń jáne úshinshi JEO-nyń qurylys jumystarynyń barysymen tanysty, dep habarlaidy "Ult aqparat" Aqordanyń baspasóz qyzmetine silteme jasap.
Astana qalasynyń ákimi Jeńis Qasymbek Memleket basshysyna «Ońtústik-Shyǵys» gaz jylý stantsiiasynyń jáne jalpy qýaty saǵatyna 700 gigakalorii bolatyn «Turan» gaz jylý stantsiiasynyń birinshi kezeńiniń qurylystary aiaqtalǵany týraly málimet berdi. Onyń aitýynsha, «Ońtústik-Shyǵys» stantsiiasy Mynjyldyq alleiasy, «Nurly jol» vokzaly, «Baǵystan» turǵyn alaby siiaqty qurylysy qarqyndy túrde júrip jatqan aýdandardy, al «Turan» stantsiiasy qalanyń sol jaǵalaýynda jańadan salynyp jatqan aýmaqty turaqty jylýmen qamtamasyz etedi.
Memleket basshysyna atalǵan gaz jylý stantsiialary biylǵy jylytý maýsymynyń basynan bastap iske qosylatyny jóninde baiandaldy. Jyl aiaǵyna deiin úshinshi JEO-nyń qurylysy aiaqtalady. Úsh jańa nysan qalany qosymsha jylýmen qamtamasyz etedi. Onyń qýaty – saǵatyna 1140 gigakalorii. «Turan» gaz jylý stantsiiasynyń ekinshi kezeńiniń salynýy jáne «Telman» jańa gaz jylý stantsiiasy qýaty saǵatyna 850 gigakalorii bolatyn qosymsha jylý beredi.
Qurylys kompaniiasynyń ókilderi Qazaqstanda gaz jylý stantsiialarynyń óndiristegi otandyq úlesin arttyrý úshin gaz jabdyqtaryn óndirýshi kásiporynmen arada ýaǵdalastyqtar bar ekenin jetkizdi.
Prezident gaz jylý stantsiialaryn kezeń-kezeńmen paidalanýǵa berýdi tapsyrdy.
– Eń aldymen, jobalardyń sapasy joǵary bolýǵa tiis. Biz ony qadaǵalaimyz. Mundai jobalar qalaǵa óte qajet. Men bul jerge osy maqsatpen keldim. Ár qalada úsh negizgi másele bar. Olar – jylý, jaryq jáne sý. Turǵyndar bul qajettiliktermen mindetti túrde qamtamasyz etilýi kerek. Onyń ústine, sóz elorda týraly bolyp otyr. Eshqandai kidiris bolmaýǵa tiis. Bul, túptep kelgende, bizdiń memleketimizdiń bedeli men imidjine qatysty másele. Sondyqtan atalǵan máseleni bárimiz jumylyp, mindetti túrde tolyq sheshýimiz qajet, – dedi Memleket basshysy.
Jeńis Qasymbek Prezidentke Astana sý qoimasynan tartylatyn sý qubyrynyń jáne sorǵy-súzgi stantsiiasynyń iske qosylýy jóninde aitty. Onyń málimeti boiynsha biylǵy qarashada Nura jerasty sý kózinen qýaty 48 myń tekshe metr bolatyn sý qubyryn tartý, sondai-aq «Telman» sorǵy stantsiiasynyń qýatyn kúnine 160 myń tekshe metrge deiin jetkizý jónindegi jobalaý jumystary aiaqtalady.
Qasym-Jomart Toqaev elorda halqynyń sany jyldan-jylǵa kóbeiip kele jatqanyna bailanysty qosymsha sý kózderimen qamtamasyz etý joldaryn izdeý qajettigine nazar aýdardy. Sondai-aq qaladaǵy jańa jylý nysandarynyń qurylysyn ýaqtyly aiaqtaýdy tapsyrdy.
