Polshada ótken «Junior Eurovision-2019» án baiqaýynda ekinshi oryn alǵan Erjan Maksim qazaqstandyqtarǵa alǵys aitty, – dep habarlaidy «Ult aqparat».
Jas ánshi Instagram-daǵy paraqshasynda jankúierleriniń zor qoshemetpen qarsy alyp jatqany túsirilgen videony jariialady. Qazaqstannyń kók Týyn jamylǵan ánshini jankúierleri «Erjan, Qazaqstan» dep daýystap, qushaq jaia kútip alǵan.
Kók týdy jelbiretken jas ánshini Dimash Qudaibergen de quttyqtap, Instagram-daǵy paraqshasynda «Qulynshaq, jeńisiń qutty bolsyn! Ekinshi oryn emes men úshin birinshi oryn dep bilemin!!! Jaraisyń balapan!!!» dep jazdy.
Óz kezeginde Erjan Maksim qazaqstandyqtarǵa alǵysyn aitty. «Qurmetti dostarym, apa-aǵalarym, ata-ájelerim. Maǵan daýys bergenderińiz úshin kóp-kóp rahmet! Osy jeńiske sizderdiń arqalaryńyzda jetip otyrmyn» dep jazdy ánshi.
Eske sala ketsek, Polshada ótken «Junior Eurovision-2019» án baiqaýynda baq synaǵan qazaqstandyq Erjan Maksim ekinshi oryn alǵan bolatyn. Qazylardyń bergen baǵasy boiynsha Erjan Maksim birinshi oryn aldy. Al onlain daýys berý qorytyndysymen 79 upai jinady. Osylaisha qazaqstandyq ánshi jalpy 227 upaimen ekinshi oryn boldy. Baiqaýdyń bas júldesin 278 upai jinaǵan Polsha ókili Viki Gabor jeńip aldy.
Erjan Maksim 2007 jyly Oral qalasynda dúniege kelgen. Tórt jasynan án sala bastaǵan. Alty jasynan bastap vokal sabaǵyna barǵan. Erjan kóptegen baiqaýdyń jeńimpazy. 2016 jyly Erjan Maksim Batýmide ótken Dolphin Fest festivalinde bas júldeni jeńip alsa, 2016 jyldyń jeltoqsanynda Latviiada ótken osyndai jarystarǵa birneshe sanat boiynsha birden qatysyp, eki altyn jáne bir kúmis medal jeńip alǵan. 2017 jyly Vitebskide ótken «Slavian bazary» halyqaralyq baiqaýynda ekinshi oryn ielengen.
2017 jyldyń 3 mamyrynda ol Italiiadaǵy San-Remo jasóspirimder festivalinde óner kórsetip, simfoniialyq orkestrmen birge án shyrqady. Italiiada Erjan finalist atanǵan edi. Al 2018 jyly kúzde ol «Junior Eurovision» halyqaralyq án baiqaýynyń finalisteriniń qataryna kirgen. 2019 jyly «Golos.Deti. 6 sezon» shoýynyń jeńimpazy boldy.
Eske sala ketsek, QR Prezidenti Qasym-Jomart Toqaevtyń Erjan Maksimdi án baiqaýyndaǵy júldesimen quttyqtaǵan bolatyn.
