Qazaqstan Respýblikasy Prezidentiniń halyqaralyq yntymaqtastyq jónindegi arnaýly ókili Erjan Qazyhannyń Jenevaǵa jumys sapary aiasynda BUU júielik uiymdarynyń basshylyǵymen kelissózder ótti. Bul týraly SIM habarlady.
BUU Adam quqyqtary jónindegi Joǵarǵy komissary Mishel Bacheletpen kezdesý aiasynda Prezidenttiń arnaýly ókili E. Qazyhan Qazaqstannyń BUU Adam quqyqtary jónindegi basqarmasymen yntymaqtastyǵynyń basym baǵyttaryn talqylady. Taraptar quqyq qorǵaý salasyndaǵy ulttyq zańnamany jáne quqyq qoldaný praktikasyn jetildirý boiynsha ózara is-qimyldyń úlken tájiribesin, sondai-aq Qazaqstannyń Adam quqyqtary salasyndaǵy eleýli progresin atap ótti.
BUU Adam quqyqtary jónindegi Joǵarǵy komissary Mishel Bachelet elimizdegi jetistikter men saiasi ózgeristerdi joǵary baǵalap, QR Prezidentiniń 9 maýsymdaǵy «Adam quqyqtary salasyndaǵy odan arǵy sharalar týraly» Jarlyǵynyń jáne Adam quqyqtary salasyndaǵy birinshi kezektegi sharalardyń ulttyq josparianyń negizgi maqsattarynyń mańyzdylyǵyn erekshe atap ótti. Joǵarǵy komissar Memleket basshysy Q. Toqaevtyń jaqyn arada Qazaqstanǵa kelýge shaqyrý jónindegi jeke joldaýyn rizashylyqpen qabyldady.
Dúniejúzilik saýda uiymynyń (DSU) Bas direktory Ngozi Okondjo-Ivealamen kezdesý 2021 jyldyń sońynda Jenevada Qazaqstannyń tóraǵalyǵymen alǵash ret ótetin DSU-nyń 12-shi ministrlik konferentsiiasynyń mańyzdylyǵyn jáne daiyndyq barysyn jan-jaqty talqylaýǵa múmkindik berdi. E. Qazyhan Qazaqstannyń damýy múddesinde DSU-men tyǵyz ózara is-qimylyn atap ótip, DSU basshysyn elimizdiń teń quqyly saýdany jáne vaktsinalarǵa ádil qol jetimdilikti qamtamasyz etýge, sondai-aq jahandyq ekonomikany qalpyna keltirýge baǵyttalǵan bastamalaryn tolyq qoldaitynyn rastady.
DSU basshysy Qazaqstan DSU-nyń eń bedeldi memleketteriniń biri ekenin aityp, uiym qyzmetine turaqty jáne júieli qoldaý kórsetkeni úshin elimizge alǵysyn bildirdi. Ngozi Okondjo-Iveala Qazaqstan Prezidentine Jenevada ótetin konferentsiianyń ashylýyna jeke qatysýǵa resmi shaqyrý joldady.
BUU-nyń Jenevadaǵy bólimshesiniń Basshysy Tatiana Valovaiamen kezdesý barysynda qarýsyzdaný, klimattyń ózgerýi, «KazAID» jelisimen gýmanitarlyq kómek kórsetý jáne turaqty damý maqsattary salasyndaǵy qazaqstandyq bastamalardy ilgeriletý máseleleri talqylandy. E. Qazyhan Prezident Q. Toqaevtyń Biologiialyq qaýipsizdik jónindegi halyqaralyq agenttikti qurý boiynsha bastamasynyń ózektiligin atap ótti, sondai-aq Semeidegi synaq poligony jabylýynyń 30-jyldyǵyna jáne Ortalyq Aziiada iadrosyz aimaq qurý týraly shartqa qol qoiylýynyń 15-jyldyǵyna orailastyrylǵan is-sharalardy BUU tarapynan qoldaýdyń mańyzdylyǵyn atap ótti.
Qazaqstan Almaty qalasyndaǵy Ortalyq Aziia elderi men Aýǵanstan úshin arnalǵan BUU ortalyǵynyń bazasynda óńirlik jobalardy iske asyrýda, ásirese tómen kómirtekti damý, transshekaralyq sý resýrstary, azyq-túlik qaýipsizdigi, áielderdiń arasynda kásipkerligin damytý, genderlik teńdik jáne t. b. máseleler boiynsha BUU-nyń Jenevadaǵy keńsesiniń qoldaý kórsetýine úmittenedi.
DDU basshylyǵymen Prezident Q. Toqaevtyń DDU bas direktory T. Gebreiesýspen qol jetkizgen ýaǵdalastyqtarynyń iske asyrý barysy talqylandy. Qazaqstannyń DDU-men meditsinalyq-sanitariialyq alǵashqy kómek salasyndaǵy úlgili yntymaqtastyǵy QR Prezidentiniń BUU aiasynda aýrýlardy baqylaý jáne bioqaýipsizdik jónindegi óńirlik ortalyqtar jelisin qurý týraly bastamasyn iske asyrý boiynsha birlesken is-qimyldardyń jańa shegterin ashady.
DDU Bas direktorynyń orynbasary S. Iakab COVID-19 pandemiiasymen kúres boiynsha is-qimylǵa, Qazaqstandaǵy vaktsinatsiia qarqynyna joǵary baǵa berip, Uiymnyń basqa memleketterge járdem kórsetý úshin paidalanylýy múmkin bolatyn otandyq «QazVac» vaktsinasyn jedel sertifikattaýǵa jan-jaqty kómek kórsetýge daiyndyǵyn bildirdi.
Sapar barysynda Arnaýly ókil E. Qazyhan Halyqaralyq eńbek uiymynyń (HEU) jáne BUU-nyń Eýropalyq ekonomikalyq komissiiasynyń basshylyǵymen de kezdesti.
