Oblys ákimi Ábilqaiyr Sqaqov Pavlodar aktivine qalanyń jańa basshysyn tanystyrdy. Óńir basshysy Qairat Núkenovke atqarǵan jumysy úshin alǵysyn bildirip, jańa ákimniń aldyna mindetter qoidy, dep habarlaidy "Ult aqparat" Pavlodar qalasy ákiminiń baspasóz qyzmetine silteme jasap.
«Basty mindetterdiń biri – ekonomikalyq ósimdi qalpyna keltirip, biznestiń damýyna jaǵdai jasaý. Pavlodarda «Jumyspen qamtýdyń jol kartasy» baǵdarlamasy iske asyrylýda, árbir jobanyń sapasy men merzimin qadaǵalaý qajet. Sondai-aq, turǵyn úi qurylysy, páter ieleri kooperativteriniń jumysy jáne jylytý maýsymyna daiyndalýǵa bailanysty birqatar mindet tur. Turǵyn úi qurylysynyń naqty, startegiialyq baǵdarlamasy qajet. Biraq ákimdik jumysynyń basty kórsetkishi – qala turǵyndarynyń qanaǵattanýy men turǵyndardyń bilikke degen seniminiń artýy. Qala ákimdigine turǵyndarmen tikelei dialogty nyǵaitý qajet», - dedi oblys ákimi.
Erjan Imanislám 1972 jyly Pavlodar oblysynda dúniege kelgen. 1991 jyly Krasnoarmeika aýyl sharýashylyǵy tehnikýmyn (tehnik-mehanik), 2007 jyly Qazaq quqyqtaný jáne halyqaralyq qatynastar institýtyn (quqyqtaný bakalavry), 2014 jyly Innovatsiialyq Eýraziia ýniversitetin (ekonomika jáne biznes bakalavry) jáne 2017 jyly Abai Myrzahmetov atyndaǵy Kókshetaý ýniversitetin (tasymaldaýdy uiymdastyrý, qozǵalys jáne kólikti paidalaný salasyndaǵy bakalavr; zań ǵylymdarynyń magistri) bitirgen.
Eńbek jolyn 1987 jyly Qashyr aýdany, Kalinovka aýylyndaǵy qurylys ýchaskesinde jumysshy bolyp bastaǵan. Tehnikýmnan keiin Erjan Imanslám Qashyr kentindegi qurylys materialdary men konstrýktsiialar kombinatynda usta-santehnik bolyp jumys istedi. Shekara áskerlerindegi qyzmetten keiin Pavlodardaǵy «Energojilstroi-1» qurylys basqarmasynyń montajshysy boldy.
1994-2000 jyldar aralyǵynda Erjan Imanislám Qashyr aýdanynyń ishki ister bólimi men prokýratýrasynda túrli laýazymdarda qyzmet atqardy. 2005-2008 jyldary Qashyr aýdanynyń ákimdiginde jumys istedi, onyń ishinde ákim apparatyna basshylyq etti. 2008 jyldan 2011 jylǵa deiin Aqsý qalasynyń ákimdiginde jumys istedi, qala ákiminiń orynbasary boldy.
2011-2013 jyldar aralyǵynda Pavlodar ákimi apparatynyń basshysy, 2013-2014 jyldar aralyǵynda Pavlodar qalasy ákiminiń orynbasary qyzmetterin atqardy.
2017 jylǵa deiin Soltústik Qazaqstan oblysynda indýstrialdy-innovatsiialyq damý basqarmasynda qyzmet atqardy, sondai-aq Taiynsha aýdanynyń ákimi boldy. 2020 jylǵy 27 shildede Pavlodar ákimi bolyp taǵaiyndalǵanǵa deiin QR Indýstriia jáne infraqurylymdyq damý ministrliginde qyzmet atqardy, onyń ishinde IIDM komitetiniń mashina jasaý basqarmasyn basqardy.
