QR Eńbek jáne halyqty áleýmettik qorǵaý vitse-ministri Erjan Birjanov ulttyq biliktilik júiesindegi problemalardy atady, dep habarlaidy QazAqparat.
«Ulttyq biliktilik júiesi - bilim berý júiesi men eńbek naryǵy arasyndaǵy ózara bailanysty qamtamasyz etetin tetik. Búginde mynadai problemalar bar: biliktilikti taný amaldarynyń ártúrli ári júiesiz tásili; sertifikattaýdy ótkizý sapasy boiynsha baqylaýdyń bolmaýy; sondai-aq biliktilikti taný júiesin damytý úshin yntalandyrý sharalarynyń jetkiliksizdigi. Sondyqtan biz mynadai mindetterdi sheshýge tiispiz: biliktilikti tanýdyń qoldanylatyn barlyq tásilin zańnamalyq turǵyda bekitý; bilim berý salasyndaǵy atlas engizý; biliktilikti taný júiesine kirý úshin yntalandyrý is-sharalaryn aiqyndaý. Osy is-sharalardy júzege asyrý ulttyq biliktilik júiesiniń barlyq elementterin júieleýge múmkindik beredi. Bul óz kezeginde quqyqtyq bazany qurýǵa, sondai-aq biliktilikti taný júiesin retteýdi birizdendirýge yqpal etedi», - dedi vitse-ministr Májiliste jumyskerlerdi qaita oqytý jáne olardyń daǵdylaryn turaqty jetildirý jónindegi jańa tásilderge arnalǵan dóńgelek ústel otyrysy barysynda.
Sonymen qatar ol atalǵan baǵytta júrgizilgen jumystarǵa toqtalyp ótti.
«Biz salalyq memlekettik organdarmen jáne jumys berýshilermen birlesip, Ulttyq biliktik júiesin damytý aiasynda 589 kásibi standartty ázirledik jáne buiryq arqyly bekittik. Osy kásiptik standarttardyń negizinde 250 bilim berý baǵdarlamasy jańartyldy. Tehnikalyq jáne kásiptik bilim deńgeileri 102 úlgilik oqý baǵdarlamasyn ózektendirdi. Sonymen qatar Dúniejúzilik bankpen birlesip, ekonomikanyń 9 salasynan turatyn «Eńbek naryǵynda suranysqa ie jańa mamandyqtar men biliktilikter atlasyn» jasadyq. Biyl da ulttyq biliktilik júiesin jetildirý jumysy jalǵasatyn bolady»,- dedi Erjan Birjanov.
