Almaty qalasy ákiminiń orynbasary Erjan Babaqumarov beinekonferentsiia bailanys rejiminde Ortalyq qalalyq klinikalyq aýrýhananyń ujymymen kezdesý ótkizdi, dep habarlaidy "Ult aqparat".
Kezdesýge Densaýlyq saqtaý vitse-ministri Lázzat Aqtaeva, sondai-aq qalalyq Qoǵamdyq densaýlyq basqarmasy men Taýarlar men qyzmetterdiń sapasy men qaýipsizdigin baqylaý departamentiniń basshylary, aýrýhananyń bas dárigeri qatysty.
Kezdesý kezinde naýqastar men aýrýhana qyzmetkerlerin ornalastyrýdyń, qaýipsizdiktiń sanitarlyq-epidemiologiialyq sharalaryn saqtaý ahýaly talqylandy.
«Biz qalalyq aýrýhananyń dárigerleri men meditsinalyq qyzmetkerlerin qandai jaǵdai alańdatatynyn, qalyptasqan jaǵdaidy tikelei rettep, oryn alǵan máselelerdi sheshý úshin barlyq sharalardy qabyldaý maqsatynda jinalyp otyrmyz», – dedi Erjan Babaqumarov.
Sondai-aq, ol aýrýhana ujymyna juqtyrý jaǵdailaryna qaramastan, sabyrlyq tanytyp, jasaǵan jumystary úshin alǵysyn bildirdi.
Onlain rejimde hirýrgiia bóliminiń meńgerýshisi N. Kemelhanov, fizioterapiia bóliminiń meńgerýshisi A. Tórequlova, nevrologiia bóliminiń meńgerýshisi G. Qusaiynova, reanimatsiia bóliminiń meńgerýshisi G. Berdalina, travmatolog-dáriger G. Egemov pikir bildirdi.
Kezdesý qorytyndysynda qala ákiminiń orynbasary Erjan Babaqumarov kóterilgen máselelerdi sheshý boiynsha birqatar naqty tapsyrmalar berdi.
Aita ketý kerek, Almatyda koronavirýs juqtyrǵan meditsina qyzmetkerleriniń sany 234 jetken bolatyn.
Búgin jedel járdem qyzmetiniń taǵy 4 qyzmetkeriniń taldaýy oń nátije kórsetti.
