Búgin Senattyń jalpy otyrysynda 2021 jylǵy respýblikalyq biýdjettiń atqarylýy týraly esepti qaraý kezinde Premer-Ministrdiń orynbasary – Qarjy ministri Erulan Jamaýbaev memleket boryshyn basqarý máselesine qatysty túsinik berdi, dep habarlaidy QazAqparat.
«Memleket boryshynyń ósýi respýblikalyq biýdjet tapshylyǵyn jabý qajettiligimen jáne mańyzdy áleýmettik jobalardy qarjylandyrý úshin qaryz alýmen bailanysty boldy. Degenmen, búgingi tańda memleket boryshy qaýipsiz deńgeide saqtalyp, jalpy ishki ónimge shaqqanda 27,4 paiyzdy quraidy», - dedi E. Jamaýbaev.
Onyń aitýynsha qaryzdy basqarýdy odan ári jetildirý úshin tiisti sharalar qabyldanady. Birinshiden, biýdjet tapshylyǵy kezeń-kezeńimen azaiatyn bolady, bul boryshtyń ósý qarqynyn tómendetýge yqpal etedi. Ekinshiden, ákimshilendirýdi jaqsartý jáne tsifrlandyrý nátijesinde salyq túsimderin birtindep ulǵaitý josparlanyp otyr. Úshinshiden, qaryz alý kezinde ishki naryqtyń ótimdiligi barynsha paidalanylatyn bolady.
«Budan basqa, zańnamada syrtqy qaryz qarajatyn ýaqytyly igermegeni úshin memlekettik organnyń birinshi basshysynyń jaýapkershiligin belgileý jóninde norma qabyldanǵanyn atap ótý qajet. Jalpy, Úkimet júieli túrde memlekettik jáne memleket kepildik bergen boryshty, sondai-aq kvazimemlekettik sektordyń boryshyn qalyptastyrýǵa jáne basqarýǵa baqylaýdy kúsheitetin bolady», - dedi Premer-Ministrdiń orynbasary.
