Pavlodar oblysynda Ertis ózeninde aýdarylyp ketken qaiyqtaǵy bes adamnyń biri áli tabylmai jatyr. Qutqarýshylar er adamdy ekinshi kúnnen beri izdestirýde, dep habarlaidy ult.kz.
Pavlodar oblysynyń tótenshe jaǵdailar departamentiniń málimetinshe, izdeý jumystaryna jedel-qutqarý jasaǵynyń alty qyzmetkeri, úsh júzý quraly jáne eholottar jumyldyrylǵan.
Eholottyń kómegimen Ertis ózeniniń túbiniń 35 shaqyrymy zerttelgen. Sonymen qatar súńgýirler 11 ret sýǵa túsip, ózen túbiniń shamamen 5 myń sharshy metr aýmaǵyn teksergen.
Oqiǵa Janaýyl aýylynyń mańynda bolǵan. Bul jerde aliýminii qaiyq aýdarylyp ketken. Onyń ishinde bes adam bolǵan. Tórteýi óz betimen jaǵaǵa shyqqan. Al 1983 jyly týǵan er adam sýǵa batyp ketken bolýy múmkin.
Qazirgi ýaqytta izdeý jumystary jalǵasyp jatyr.
