Qazaqstan Halyq partiiasynyń XIX kezekten tys sezinde partiia basshylyǵynyń quramy ózgerdi. Ermuhamet Ertisbaev QHP tóraǵasy bolyp sailandy. QHP parlamenttik fraktsiiasynyń burynǵy basshysy, Májilis depýtaty Aiqyn Qońyrov tóraǵanyń birinshi orynbasary bolyp taǵaiyndaldy, dep habarlaidy "Ult aqparat" partiianyń baspasóz qyzmetine silteme jasap.
Sezd Qazaqstan Halyq partiiasynyń jańa maqsattary men mindetterine arnaldy. Partiia ókilderi osyǵan deiin atqarylǵan jumystardy saralady. Basqosý barysynda partiia janynan qurylǵan múgedek adamdardyń quqyqtary jónindegi jobalyq keńseniń qyzmeti tilge tiek etilip, eńbek quqyqtary salasyndaǵy kásipodaqtarmen yntymaqtastyqtyń nátijesi baiandaldy.
Aiqyn Qońyrov Qazaqstan transformatsiianyń kúrdeli ári ótpeli kezeńin bastan ótkerip jatqanyn jariialady. Ol Memleket basshysy Qasym-Jomart Toqaevtyń reformalary qoǵamdy demokratiialandyrýǵa jáne bilik tarmaqtarynyń teńgerimdiligin qamtamasyz etýge baǵyttalǵanyna nazar aýdardy.
– Bul protseste saiasi partiialarǵa mańyzdy ról beriledi. Bizdiń partiianyń ádil demokratiialyq memleket qurý týraly ideiasy jan-jaqty damytýdy talap etedi. Partiianyń transformatsiiasy jalǵasyp jatyr. Bul úderis úzdiksiz bolýǵa tiis. Partiia basshylyǵy men partiia qurylymynyń quramyn tájiribeli adamdarmen tolyqtyrý, memlekettik qyzmette, ókildi organdarda, azamattyq sektorda belsendi bolý ózekti másele, – dedi Qońyrov.
Sezd barysynda QHP tóraǵasy laýazymyna Ermuhamet Ertisbaevtyń kandidatýrasy usynyldy.
– Ol kóshbasshy, ministr, depýtat, diplomat retinde tanymal. Bizdiń partiiamyzǵa tájiribesi men bilimi mol, memlekettik deńgeidegi saiasi jáne qoǵam qairatkeriniń kelýi alǵash ret bolyp otyr, – dep atap ótti kópshilik.
Kandidatýra biraýyzdan maquldandy.
Óz kezeginde Ertisbaev partiia múshelerine senim bildirgenderi úshin alǵys aityp, senimdi tolyq aqtaý úshin kúsh-qýatyn, bilimin jáne saiasi tájiribesin jumsaýǵa ýáde berdi.
«Qazaqstan Halyq partiiasy – solshyl-ortalyq partiia. Men úshin bul – óte mańyzdy. Men ómir boiy sotsialist boldym», – dedi ol.
Jańa tóraǵa qazirgi tańda qazaqstandyqtardyń QHP-ǵa degen senimi aitarlyqtai artyp kele jatqanyn atap ótti.
– Halyq partiiasy degen ataýdyń ózi ýaqyt óte kele onyń máslihattarda, Májiliste, Senatta ústemdik etý kerektigin meńzeidi, – dedi Ermuhamet Ertisbaev.
