Aqqýly aýdanynyń Iamyshevo aýyly mańyndaǵy kólde aqqýlar uia salǵan. Bul týraly agenttikke kieli qustardyń sýretterin joldaǵan Aqqýly aýdany ishki saiasat bóliminiń bas mamany Amanjol Erenuly málim etti, dep habarlaidy pavlodarnews.kz.
«Pavlodar qalasynan aýdanǵan ketip bara jatqan edim. Bir kezde sýdyń jaǵasynda júrgen eki kieli qus pen úirek-qazdardy kózim shalyp qaldy. Tabiǵattyń ásem kórinisi men qustardy sýretke túsirip alý kópten beri ádetke ainalǵan. Sol ádetim boiynsha kólikten túsip jaqyndap edim, qanattylar sý aidynynda qara tústi 7-8 kógildirimen birge júzip júr eken. Bizdiń ólkege bul qustar sońǵy jyldary jii ushyp keletin boldy. Degenmen balapandarymen birge júrgeni tańdandyrdy», - deidi Amanjol Erenuly.
Biologiia ǵylymdarynyń doktory, professor Qaiyrbai Bazarbekov, qara qýlar Avstraliiada mekendeitinin, bul sol jaqtan kelgen qustar bolýy múmkin ekenin aitady. «Olardy avstraliialyq qara qýlar dep ataidy», - deidi Qaiyrbai Bazarbekov.
Professordyń aitýynsha, aqqýlar keide Almaty óńirinde, Kaspii teńizinde qystaidy. Ári qarai Avstraliia, Afrikaǵa ushyp ketedi. Qazirgi tańda kieli qustar aimaqtyń kóptegen jerlerinde kezdesedi. Oǵan tynyshtyq faktory, iaǵni qaýip-qaterdiń az bolýy áser etedi.
«Mysaly, jýyrda áýejaidyń janynda jáne Aqtoǵai aýdanynyń mańynda 28 aqqýdy kórip qaldyq», - deidi Qaiyrbai Bazarbekov. «Olardyń ishinde úlken jáne qońyr tústileri de kezdesedi. Birinshi jyly aqqýdyń kógildirleri sur tústi bolady, tek úshinshi jyly ǵana aǵarady. Sondyqtan bul balapandardyń da aǵaryp ketpesine kepildik joq. Ádette, aqqýlar jaz mezgilinde keledi de kúzdiń qarasha aiynda ushyp ketedi. Osyǵan deiin oblysta qara qýdy kezdestirgen joqpyn».
Eske sala keteiik, Aqqýly aýdanynyń ortalyǵyndaǵy shaǵyn kólshikterge biyl mamyr aiynyń ortasynda jup-juppen alty aqqý ushyp kelgen bolatyn.
