Foto: E. Bapidyń jeke arhivi
Májilis depýtaty Ermurat Bapi Bas prokýror Berik Asylov atyna depýtattyq saýal joldap, internet keńistiginde belsendi áreket etip júrgen psevdodini tulǵalardyń qoǵamǵa tóndirip otyrǵan qaýpin kóterdi, dep habarlaidy Ult.kz.
Depýtat óz saýalynda bul másele alǵashynda jekelegen azamattardyń pikiri siiaqty kóringenimen, shyn máninde qoǵamdyq turaqtylyqqa, ulttyq mádeni biregeilikke jáne aqparattyq qaýipsizdikke eleýli qater tóndiretinin atap ótti. Onyń aitýynsha, áleýmettik jelilerde dindi jamylyp, halyq sanasyna yqpal etýge tyrysatyn «psevdodini avtoritetter» kóbeigen.
Ermurat Bapi sońǵy ýaqytta qoǵamda rezonans týdyrǵan oqiǵany mysalǵa keltirdi.
"Týrasyn qaimyqpai aitqanda, dúmshe dogmany tyqpalaǵan bul qarabaiyr dindarlar bizdiń ulttyq ustanymdy iritip, memleketimiz ben qoǵamnyń taǵanyn teńseltýde. Sońǵy aptada biz birer osyndai dańǵaza dabyranyń kýási boldyq. Internet podkastardyń birinde resmi dini qurylymǵa qatysy joq áldebir “imam-symaq” úsh áieli baryn sóz etip, sońǵysyn óziniń shákirtine “syiǵa tartqanyn” jaibaraqat jariia etti.
Bul málimdemeni adami moralǵa jat qylyq qana emes, sonymen birge azamattyq neke jónindegi zańnamany kópe-kórneý buzý, qazirgi Qazaqstandaǵy dástúrli dindi mansuq etý jáne onyń qundylyqtaryna qasa-qana nuqsan keltirý dep túsiný kerek. Jalpy adamdy syiǵa tartý – bul adam satý, adam saýdasy sanatyndaǵy qylmys sanalýy tiis! Zańdy belshesinen basyp, oiyna kelgen shariǵatyn shatyp otyratyn mundailarǵa tosqaýyl qoiylýy kerek!
Adam túgili, haiýanǵa janashyrlyq tanytýdy dáripteitin din ókili óz áielin haiýannan beter etip, ashyq syiǵa berýi – qoǵamdyq jazǵyrýǵa para-par qylmys sanalýy tiis!" - dedi depýtat.
Sonymen qatar, depýtat bul jaǵdaidy jariia etken jýrnalist Janar Baisemizova kásibi etika talaptaryn saqtamady dep synǵa aldy. Ol buqaralyq aqparat quraldary ókilderin haip qýýdan góri qoǵamdyq jaýapkershilikti joǵary qoiýǵa shaqyrdy.
Depýtat taǵy bir mysal retinde áleýmettik jelilerde Naýryz meiramyn «islamǵa jat» dep sipattaǵan pikirlerdiń taralýyn atap ótti. Onyń aitýynsha, mundai kózqarastar qazaq halqynyń ǵasyrlar boiy qalyptasqan salt-dástúrine, mádenietine jáne ulttyq bolmysyna kúmán keltiredi.
Ermurat Bapi qazirgi tańda teris dini nasihattyń, ásirese jastar arasynda keń taralyp bara jatqanyn erekshe alańdaýshylyqpen jetkizdi. Ol áleýmettik jelilerdegi baqylaýsyz kontent jas býynnyń dúnietanymyna keri áser etip, olardy dástúrli qundylyqtardan alystatýy múmkin ekenin eskertti.
Osyǵan bailanysty depýtat ákimshilik sharalarmen shektelý jetkiliksiz ekenin aityp, dini arazdyqty qozdyrý jáne radikaldy kózqarastardy nasihattaý faktileri boiynsha qylmystyq jaýapkershilikti kúsheitýdi usyndy. Onyń pikirinshe, mundai normalardy Parlament deńgeiinde talqylaý qajet.
Sondai-aq depýtat Qazaqstan musylmandary dini basqarmasy jumysyna da toqtalyp, resmi dini institýttardyń aqparattyq keńistikte belsendi bolýy tiis ekenin aitty. Ol dini basqarma ókilderin qoǵamda týyndap jatqan daýly máselelerge der kezinde ún qatyp, túsindirý jumystaryn kúsheitýge shaqyrdy.
Depýtattyń aitýynsha, qazirgi tańda jastardyń dini tanymy meshitten góri áleýmettik jeliler arqyly qalyptasyp jatyr. Eger bul keńistikte resmi ári senimdi aqparat jetkiliksiz bolsa, onyń ornyn radikaldy jáne qaýipti ideialar basýy múmkin.
"Búginde óziniń sandyraǵyn resmi islam men shariǵattyń normasyna ainaldyrǵan, dini bilimi kende, dini statýsy kúdikti dúmsheler áleýmettik jelilerde órip júr. Olar qoǵamdy radikaldyq oi-áreketke jetelep, eldegi musylman qaýymy arasyna iritki salyp, bizdiń halyq ejelden tabynatyn dástúrli islamnyń dini qaǵidalaryn burmalaýda", - dedi ol.
Ermurat Bapi sóz sońynda ulttyq qundylyqtar men zaiyrly memleket qaǵidattaryn qorǵaý – basty mindetterdiń biri ekenin atap ótip, bul baǵytta júieli ári qatań sharalar qabyldaý qajettigin jetkizdi.
