QR din isteri jáne azamattyq qoǵam ministri Nurlan Ermekbaev esep berý barysynda Siriiaǵa ketip qalǵandarǵa qatysty suraqtarǵa jaýap berdi, - dep habarlaidy kaz.tengrinews.kz tilshisi vedomstvonyń baspasóz qyzmetine silteme jasap.
Ministr Siriiaǵa ketip qalǵan adamdarǵa qatysty máselelerdiń vedomstvonyń quzyretinde emes ekenin aityp túsindirdi. Onyń aitýynsha, adamdardyń Siriiaǵa ketýi tek dini nanym-senimdermen bailanysty emes.
"Bul adamdar islam qundylyqtaryn múlde durys túsinbeidi. Bizdiń elde kez kelgen dinniń senýshilerine barlyq jaǵdai jasalǵan. Eshkim eshkimge jábir kórsetpeidi. Dinge senetin adamdardyń quqyqtary bar. Olar ózderiniń ádebietin oqi alady, árine, eger ol elimizdiń zańnamasyna qaishy kelmese. Osylaisha elden ketip jatqan adamdar "din" degen sózdiń maǵynasyn burmalaidy. Olar zańbuzýshy bolyp sanalady", - dedi Ermekbaev.
Vedomstvo basshysynyń aitýynsha, zańnamada elden ketip qalǵan jáne terroristik uiymdarǵa qatysyp júrgen adamdardyń sottyń sheshimimen azamattyǵynan aiyrylatyny jaily norma qarastyrylǵan.
"Osy kezde ǵana elden ketken adamdardyń joly jabylady. Sondyqtan kez kelgen adam elden ketpei turyp jáne terroristik uiymdarǵa kirmei turyp ózin jáne otbasyndaǵy basqa múshelerdi otanynan jáne azamattyǵynan aiyratynyn oilaý kerek. Siriiaǵa ketip jatqan adamdardyń 90 paiyzy óz isterine ókinip jatady. Bireýleri sonda qaza bolyp, otanyna qaita almasa, taǵy bireýleri jazadan qorqyp, qaityp kele almai otyr. Munyń barlyǵy Internettegi nasihattyń saldarynan bolyp otyr. Sonda baryp, halifatta ómir súrgisi keledi. Biraq onda eshqandai halifat joq, onda zorlyq pen urlyq jáne sol siiaqty qylmystyq áreketter bolyp jatatyn naǵyz qylmystyq uiymdar bar", - dedi Ermekbaev.
"Óz atymnan aitarym, men qyzmetime bailanysty birneshe jyl boiy túrli qalalarda boldym. Ár elde kemshilik bar, ol bolady da. Bizde de kemshilikter bar. Biraq óz týǵan jerińnen jaqsy jer bolmaidy. Eń jaqsy memleket - ol seniń otanyń", - dedi ministr Ermekbaev.
