QR Parlamenti Senatynda azamattyq qoǵam máseleleri boiynsha ótken dóńgelek ústel otyrysynda Din isteri jáne azamattyq qoǵam ministri Nurlan Ermekbaev dini saladaǵy zań jobasynyń keibir normalaryna túsinikteme berdi.
«Keibir adamdardyń qate túsinikteri nemese ádeii jasalyp otyrǵan jalǵan, burmalaǵan málimetteri boiynsha mynany aitqym keledi, zańnyń ózinde mektep kiimi, mindetti ekpe egý normalary týraly sóz qozǵalmaǵan, saqal, shalbar, t.b. siiaqty sózder múldem joq», - dep basa aitty ministr.
N. Ermekbaevtyń aitýynsha, zań jobasy qoǵam men memleket aldynda adamdar óz mindetterin saqtai otyryp, olardyń quqyqtary men erkindikterin qamtamasyz etý máselesin bastapqy orynǵa qoiyp otyr. Zań jobasynyń bastapqy usynylǵan normalary túsken usynystardy esepke ala otyryp túzetilý ústinde.
Dini saladaǵy zań jobasy elimizdegi turaqtylyq pen qaýipsizdiktiń berik irgetasyn qalyptastyrýǵa baǵyttalǵan.
«Qazaqstan Respýblikasynyń azamattyq qoǵamdy damytý máseleleri boiynsha zańnamasyn jetildirý» taqyrybynda ótken dóńgelek ústel otyrysyna depýtattar men memlekettik organ ókilderi, qoǵamdyq birlestik jetekshileri qatysyp, memlekettik organdar men úkimettik emes uiymdardyń arasyndaǵy ózara is-qimyl máseleleri boiynsha pikir almasty.
Atap aitqanda, qoǵamdyq keńesterdiń mindetteri, úkimettik emes uiymdardyń áleýmettik áriptestigin nyǵaitý, memlekettik áleýmettik tapsyrys sapasyn arttyrý, úkimettik emes uiymdarǵa granttar bólý, volonterlyq qyzmetti damytý, «Rýhani jańǵyrý» baǵdarlamasy aiasynda «Atameken» kishi baǵdarlamasyn iske asyrý barysy talqylandy.
