Bizde sheneýnikter halyqqa qarsy jumys jasaidy. Men bizdiń sottarǵa senbeimin. Men bizdiń dárigerlerge senbeimin. Men bizdiń zań oryndaryna senbeimin. Bári satylady, bári satyp alynady. Soqyr emespin, kórip, estip júrmin. Men óz filmderimdi, kitaptarymdy nasihattaý úshin el ishin aralaimyn, halyqpen kóp sóilesemin. Qai óńirge barsamda bir saryn. Elden maza ketken. Ishtei kúizelip, túiilip júr. Sharasyzdyq bar, shamyrqaný bar. Olardyń ýysynan úmittiń sońǵy jibi sýsyp barady. Meniń buny oidan shyǵaryp, jaǵdaidy ýshyqtyrmaq nietim joq. Bar bolǵany faktilerdi tizip otyrmyn.
Jiyrma jyldyń ishinde dúbára býyn ósti. Mektepte bilim nashar. JOO – múldem joq. Ol oqý orynyn aman-esen bitirip shyqqannyń ózinde mamandyǵyń boiynsha jaqsy jumysqa turaryńa esh kepildik joq. Barlyq jerde «barmaq basty, kóz qysty», týysqanshyldyq, jershildik. Tanysyń bolmasa qujatyńdy qushaqtap bos júresiń. Amalsyz para berýińe týra keledi. Seniń qarym-qabiletiń, bilimiń eshkimge kerek emes. Baiyppen qarasań biz óz bolashaǵymyzdyń kórin óz qolymyzben qazyp jatyrmyz. Oǵan túbinde ózimiz de qulaimyz. Sóitip memleketimizden aiyrylamyz.
Qazaqtar «basty bailyq – densaýlyq» degendi jii aitady. Meniń oiymsha bizge osy denniń saýlyǵy jetispeidi. Maǵynasy óte keń sóz ǵoi... Bizdiń moraldyq, aqyl-oi, dini, rýhani, saiasi, t.b. saýlyǵymyz kúmán týdyrady. Aǵzamyz dertke shaldyqqan. Ózegine túsken qurttar kemirip, jep jatyr. Sondyqtan ishimiz alai-túlei, mazamyz qashqan.
El aralap júrgende taǵy nege kózim jetti? Biz qojaiyn bolýdyn qalyppyz, biz – qyzmetshimiz.
Osy sheneýnik degenimiz kimder? Olar halyq jaldaǵan menedjerler. Eńbekpen qamtý agenttigi emes, halyq jaldaǵan! Sondyqtan olar eldiń múddesi úshin qyzmet etýleri kerek. Al bizde bári basqasha – halyqqa qarsy jumys isteidi. Áreketteri tym dóreki. Sodan baryp jurt narazylyq bildirýde. Basqa ne kútip ediń? Bul – balasynyń qolyna oiynshyq-qońyraý ustatyp qoiyp, ózi uiyqtap almaq bolǵan áýmeserdiń tirligi ǵoi...
Ermek Tursynov
Aýdarǵan Serik Ábiken
Derekkózi: ratel.kz
.jpg)