Aqmola oblysynyń ákimi Ermek Marjyqpaev Shortandy kentinde gaz ballonynyń jarylýy saldarynan qaza tapqandar men zardap shekkenderdiń otbasylaryna qandai kómek kórsetiletin aitty, dep habarlaidy QazAqparat.
«Biz osy qaiǵyly oqiǵa týraly estigen boida Kókshetaýdan Shortandyǵa jedel jettik. Gaz ballonynyń jarylýy oryn alyp, 13 adam zardap shekti. Ókinishke orai, bes adam kóz jumdy, olardyń ishinde úsh bala bar. Zardap shekkender Nur-Sultan aýrýhanalaryna jetkizildi. Búginde alty adam meditsinalyq kómek alýda», - dedi Ermek Marjyqpaev Ortalyq kommýnikatsiialar qyzmetiniń kóshpeli baspasóz máslihaty barysynda jýrnalisterdiń qoiǵan suraqtaryna jaýap berý kezinde.
Óz sózinde, aimaq basshysy jedel shtab qurylǵanyn eske saldy.
«Birinshiden, zardap shekkenderdi shuǵyl Nur-Sultandaǵy birinshi, ekinshi qalalyq aýrýhanalarǵa jatqyzý kerek boldy. Osy rette, Densaýlyq saqtaý ministrligine, Nur-Sultan qalasynyń ákimdigine úlken rahmet. Olar bizdiń naýqastardy jedel qabyldady. Jerleý rásimine kómek uiymdastyryldy. Sonymen qatar, bul úide úsh páter boldy. Olardyń barlyǵy jaramsyz bolyp qaldy, biz turǵyndardy jedel qonystandyrdyq», - dedi E.Marjyqpaev.
- Aýdandyq TJ jariialandy. Biz búgin páter satyp alý úshin 30 million teńge bóldik. Shyn máninde, ballon daladan jylytý úshin úige ákelingen jáne osy sátte jarylys boldy. Biz kórsetip otyrǵan kómekten bólek, búgin meshit tarapynan qaiyrymdylyq shoty uiymdastyrylyp, 13 million teńgeden astam qarajat jinaldy. Bul qarajat zardap shekkenderdiń emdelýi, otbasylaryna kómek kórsetýge jumsalady», - dedi aimaq basshysy.
Eske sala keteiik, 16 qarashada Aqmola oblysynyń Shortandy kentinde Lineinaia kóshesinde gaz ballonynyń jarylýy oryn alǵan bolatyn. Oqiǵa ornynda úsh adamnyń denesi tabyldy. Ár túrli jaraqatpen on adam ortalyq aýdandyq aýrýhanaǵa jatqyzyldy. Nur-Sultanda 12 jasar bala oqiǵa saldarynan kóz jumdy. Al, 23 qarashada gaz ballonynyń jarylysynan zardap shekken qyz qaitys boldy. Aqmola oblysynda zardap shekkenderge kómek kórsetý jónindegi shtab quryldy.
