Olimpiada chempiony Ermahan Ybyraiymov halyqty, ásirese jastardy maska rejimi men áleýmettik qashyqty saqtaýǵa shaqyrdy, dep habarlaidy QazAqparat.
«Qudaiǵa shúkir, eldegi indettiń beti qaitty dep úmittenip júr edik, áitse de keiingi kezde aty jaman aýrýdy juqtyryp jatqandardyń sany qaitadan kóbeiip bara jatyr eken. Qaita qorqa bastadyq. Álemdegi memleketter de qaitadan shekaralaryn tars jaýyp, etek-jeńin jiyp jatyr. Endeshe biz de saqtanaiyq. Halyqtyń bir ókilimiz. Kóptiń birimiz. El ishinde kórip-bilip júrmiz – áleýmettik qashyqty da, maska rejimin de saqtamaityndar kóp eken. Óz basym sondaidy baiqasam, onyń durys emestigin aityp júrmin. Talapty saqtamaǵan jastardy kórsem toqtatyp turyp, «Maskalaryń qaida? Nege kimeisińder? Qazir úige barasyńdar, olardyń jaǵdaiyn oilaisyńdar ma?» dep keńesimdi de aitamyn. «Bir qumalaq bir qaryn maidy shiritedi» degen sóz bar. Ózimiz úshin ǵana emes, ózge úshin de jaýapty ekenimizdi umytpaiyq», - deidi Ermahan Ybyraiymov.
Olimpiada chempiony halyqty dárigerlerdiń keńesin tyńdaýǵa shaqyrdy.
Eske sala ketsek osydan birneshe kún buryn QR Prezidenti Qasym-Jomart Toqaev qazaqstandyqtardy karantin sharalaryn saqtaýǵa úndegen bolatyn.
«Kóptegen shet elderdegi koronavirýs indetiniń taralý jaǵdaiy alańdatarlyq. Barlyq jerde qatań sharalar, onyń ishinde, lokdaýn tártibi qaita qabyldanyp jatyr. Qazaqstandyqtardy Densaýlyq saqtaý ministrliginiń usynymdaryn ustanyp, karantin sharalaryn saqtaýǵa shaqyramyn», - dep jazdy Prezident Twitter-de.
