Foto: Amanjol Tubir
Ult.kz-te jihankez jýrnalist Dinara Bolattyń ózge paiymy.
Qazirgi qoǵamda qyz-kelinshekter izdenip, túrli kitap oqyp, psihologqa baryp, terapiiadan ótip júr. Al uldar olai emes. Ádette qyzdardyń syrymen bólisýi, jylaýy, ainalasynan qoldaý izdeýi tabiǵi qalypty nárse dep qabyldaimyz. Al uldar úshin jyldar boiy “jigittiń jylaǵany uiat bolady”, “er adam myqty bolýy kerek” syndy qoǵamdyq kózqaras olardyń ashylýyna úlken kedergi. Osylaisha kóp er ataýly úshin syryn, jan-jarasyn ashyp, ortaǵa salý álsizdiktiń belgisi sanalyp, ishten tynýǵa týra keledi.
Al negizi balalyq travma tek qyzdarda emes uldar da bar.
Kóp jaǵdaida:
Áke mahabbatynyń jetpeýi
Ákesiniń shekten tys qataldyǵy, sýyqtyǵy, eshqashan ulyna kóńili tolmaýy, balany ózgelermen salystyra berýi, ne tipti ákeniń bala ómirinde bolmaýy áser etedi. Meili otbasymen birge, bólek ómir súrip jatqan áke bolsyn uly úshin mańyzdy sátterde, tárbie barysynda janynda bolmai onyń ózin qorǵansyz sezinýi - úlken jaraqat.
Ana meiiriminiń tapshylyǵy
Anasynyń bala ómirinde bola turyp, ulyn meiirlenip qushaqtamaýy, jaqsy kóretinin aitpaityn emotsionaldyq sýyqtyǵy - ul úshin óte aýyr. Jáne bir qyzyǵy, ul bala ákesiniń tastap ketkenine qaraǵanda, anasynyń tastap ketkenin aýyr qabyldaidy eken. Odan bólek anasy ákesinen, týystardan, qoǵamnan zábir kórip qinalǵan sátinde kishkentai bolyp, kómektese almaǵany ómir boiyna ókinish bolady.
Qoǵamdyq qysym
Sonymen qatar, bala kezinde áleýmettik jaǵdaiyna, túrine bailanysty túrli ortada kemsitýshilik kórýi, óziniń ýaiymymen bir ózi qorǵansyz qalýy da bolashaqta er jigitke ne agressiia, ne motivatsiia bola alady.
Paiym
Qandai aýyr jaǵdaida da halyq “Er jigittiń basyna ne kelip, ne ketpeidi” dep ony jubatqandai bolyp taǵy da bosańsymaýǵa itermeleidi. Er jigit jynysynan buryn - adam, onyń da sezimi bar dep qarastyrǵanymyz adamgershilikke jatar. Kóp jyl boiy ishinde saqtalǵan aýyr sezimder ony tuiyqtyq, óshpendilik, ishimdik pen oiyn qumarlyqqa ákelý yqtimaldyǵy joǵary.
Ata-anasyna, dosyna, jaryna ashyla almasa, onyń psihologqa baryp jeńildeýine jaǵdai jasaǵan jón. Ádette er adamdar ishindegisin aityp bosańý emotsiiasynan góri, birden nátijeni qalaidy. Psiholog dep emes, “mamanǵa baraiyq”, “maǵan kómegi boldy, qalasań basynda birge baraiyq”, “nátije emes, baǵytyn kórsetedi”, “sheshý joldaryn usynady” dep jumsartyp, jaimen baǵyttaǵan abzal. Ul, qyz dep bólmei jalpy ulttyń saý, baqytty bolashaǵy úshin árkimniń ishki kúiin retteý mindetti der edim. Qyz balasy ult tárbiesine jaýapty bolsa, ul bir memlekettiń, bir otbasynyń tutastyǵyna, qaýipsizdigine jaýapty. Al ishki ahýaly rettelmegen adamǵa basqa adamdy, eldi tapsyryp qoia alamyz ba?
Dinara Bolat
.jpg)
