Almatyda «Qazaqstandaǵy quqyq qorǵaý jáne sot júiesin jańǵyrtýdyń ózekti máseleleri» atty halyqaralyq dóńgelek ústel barysynda, QR Ishki ister ministri Erlan Turǵymbaev ishki ister organdaryndaǵy reformalar týraly aityp berdi, dep habarlaidy QazAqparat.
«Ózderińiz biletindei, 2018 jyly Elbasy ishki ister organdaryn keń aýqymdy reformalaýdy bastady. Biyl 1 qyrkúiekte Memleket basshysy óziniń halyqqa Joldaýynda politsiia qyzmetin qyzmettik modelge aýystyrýdy tapsyrdy. Prezident tapsyrmalarynyń maqsaty - halyqtyń senimine ie ishki ister organdarynyń zamanaýi tehnologiialyq júiesin qurý. Reformalardyń negizgi quraly 2019-2021 jyldarǵa arnalǵan ishki ister organdaryn jańǵyrtýdyń Jol kartasy boldy», - dedi QR Ishki ister ministri.
Sonymen qatar, atqarylǵan jumystarǵa da toqtalyp ótti.
«Birinshiden, ishki ister organdarynyń uiymdastyrýshylyq-shtattyq qurylymy ońtailandyryldy. Basshylyq laýazymyndaǵy qyzmetkerler 11% -ǵa qysqardy. Búgingi tańda 100 myń turǵynǵa shaqqandaǵy politsiia qyzmetkerleriniń sany boiynsha biz ortasha eýropalyq deńgeidemiz», - dedi ol.
Ekinshiden, ministrdiń aitýynsha, qyzmetkerlerge eńbekaqy tóleý jáne áleýmettik qorǵaý júiesi jaqsarýda. Birinshi kezeńde, 2019 jyldyń shildesinen bastap jalaqy 20-65% -ǵa kóterildi. Ekinshi kezeńde, 2021 - 2023 jyldary jalaqyny orta eseppen 30% kóterý josparlanyp otyr. Baspanany jalǵa alǵany úshin ótemaqy beriletin qyzmetkerlerdiń tizimi de keńeitildi.
«Úshinshiden, kadrlardy irikteý jáne oqytý jetildirildi. Biz vedomstvolyq bilim berýdi ońtailandyrdyq. Iaǵni, 12 oqý ornynan 5 oqý ornyn qaldyrdyq. Tórtinshiden, qyrkúiek aiynda Memleket basshysynyń Jarlyǵymen azamattyq qorǵaý salasyndaǵy fýnktsiialar jańadan qurylǵan Tótenshe jaǵdailar ministrligine berildi», - dedi Erlan Turǵymbaev.
Besinshiden, halyqpen jumys isteýdiń jańa formattary engizildi.
«Birinshi kezekte, ashyq dialog uiymdastyryldy. Ol úshin biz buqaralyq aqparat quraldaryn, internet keńistigin, «Jolda qabyldaý» aktsiialaryn qoldanamyz. Azamattardy qabyldaýǵa barlyq jaǵdai jasaldy. Búginde turǵyndardyń saýaldaryna jedel jaýap qaitarylady», - dedi ishki ister ministri.
Qylmystyq-atqarý júiesin jańǵyrtý boiynsha, 2019 jyldyń mamyr aiynda halyqaralyq forým ótti. 2019 jyldyń 27 jeltoqsanynda qabyldanǵan Zań aiasynda birqatar ázirlengen sheshimder iske asyryldy, sottalǵandardyń quqyqtaryn jaqsartýǵa baǵyttalǵan 33 túzetýler engizildi.
«2014 jyldan bastap sottalýshylardyń azaiýyna bailanysty qylmystyq-atqarý júiesiniń 14 mekemesi taratyldy. Qazir biz Prezident Ákimshiligi men Qaýipsizdik Keńesi apparatynyń basshylyǵymen Memleket basshysynyń politsiia qyzmetin qyzmettik modelge aýystyrý týraly tapsyrmasy boiynsha jumys istep jatyrmyz», - dep atap ótti ishki ister ministri.
