QR Ishki ister ministri Erlan Turǵymbaev qyzmettik boryshyn óteý barysynda qaza tapqan politsiia aǵa leitenanty Jaras Janǵaziev pen politsiia serjany Dastan Ábdiqanovtyń otbasyna kóńil aitty, dep habarlaidy QazAqparat.
«Qaiǵyly jaǵdaida qaza tapqan politseiler tótenshe jaǵdaidyń erekshe rejiminde 2 aidan astam ýaqyt jumys istedi. Olar kúndelikti qyzmetterinde karantindik sharalardy qamtamasyz etip, qoǵamdyq tártipti qorǵady. Aǵa leitenant Jaras Janǵaziev Almaty qalasynyń patýrldik politsiia polkiniń inspektory bolyp jumys istedi. 19 jyl boiy qyzmettik mindetterin abyroimen atqaryp, minsiz qyzmeti úshin birneshe márte yntalandyryldy, onyń ishinde vedomstvolyq nagradalar aldy. Kóptegen jas politseiler úshin tálimger ári úlgi bola bildi. Jaras Janǵaziev óz isiniń kásibi mamany ǵana emes, sonymen birge jaqsy áke edi. Onyń artynda eki qyzmen úshinshi sábilerin kútken jary qaldy», - dedi Erlan Turǵymbaev vedomstvonyń Telegram kanalynda.
Ministrdiń atap ótýinshe, politsiia serjanty Dastan Ábdiqanov 4 jyldyq qyzmet jolynda ózin jaýapkershiligi mol, ustanymy berik ári tyńǵylyqty oryndaýshy qyzmetker retinde kórsete bildi. Ótken jyly ǵana shańyraq kóterdi jáne bir ai buryn ǵana qyzy dúniege kelgen bolatyn.
«Ókinishke orai, qaiǵyly oqiǵa olardyń ómirin qip ketti. Eki qyzmetker de úzdikterdiń qatarynda edi jáne Otanymyzǵa áli de kóp eńbek sińire alatyn. Ishki ister ministrliginiń barlyq jeke quramy olardyń týǵan-týystarymen birge aza tutady. Barlyǵymyz úshin bul orny tolmas qaza bolyp otyr», - dedi ol.
Eske salsaq, Almaty oblysy aýmaǵyndaǵy blokposta bolǵan kólik apatynan eki politsei kóz jumǵanyn, olardyń artynda jary men balalary qalǵanyn habarlaǵan edik.
