QR Parlamenti Májilisiniń depýtaty Erlan Sairov Ulttyq qoǵamdyq senim keńesiniń VI otyrysynda aitylǵan shekaralyq aýdandar máselesi týraly pikir bildirdi, dep habarlaidy QazAqparat.
Ulttyq qoǵamdyq senim keńesiniń VI otyrysynda Prezident Qasym-Jomart Toqaev shekaralyq aýdandardy damytý baǵdarlamasyn daiyndaý týraly tapsyrma bergen bolatyn.
«Shekara mańyn bos qaldyrýǵa bolmaidy. Bul – ulttyq qaýipsizdikke tikelei qatysy bar másele. Ony júieli túrde sheshý qajet. Qomaqty qarajat kerek bolady. Úkimetke muny jan-jaqty qarastyryp, shekaralas aimaqtardy damytý jóninde usynys engizýdi tapsyramyn», - dedi Prezident.
Osy problemany Ulttyq keńes quramynda júrip belsendi kótergen Májilis depýtaty Erlan Sairov QazAqparat tilshisine atalmysh túitkildiń túiinin tarqatý týraly ideialaryn aitty.
«Búgin dúnejúzinde óte kúrdeli geosaiasi protses bolyp jatyr. Iri-iri memleketterdiń arasynda keibir kelispeýshilikter bar. Sonymen birge adamzat basqa bir geosaiasi, geoeokonomikalyq formatsiiaǵa ótip bara jatyr. Sonyń bári bizdiń syrtqy, ishki shekaralarymyzdy nyǵaitýdy talap etedi. Osy turǵydaǵy eń negizgi másele – shekaralyq aimaqtardaǵy aýdandardyń áleýmettik-ekonomikalyq damýyn shapshańdatý. Árbir memlekettiń eń negizgi kapitaly – adam. Adamdar ǵana memlekettiń «materialdyq immýniteti» bola alady. Shekarada halyq bolǵanda ǵana onyń qaýipsizdigine kepildik bar. Sondyqtan biz eń birinshi shekaralyq aýdandarǵa adam resýrsyn shoǵyrlandyrýymyz kerek», - deidi depýtat.
Májilis ókili shekaralyq aýdandardyń jaǵdaiymen arnaiy baryp tanysqan kezde birneshe júielik problemalarǵa kýá bolǵanyn aitady.
«Mysaly, Shyǵys Qazaqstan oblysynyń ońtústik bóligindegi burynǵy Katonqaraǵai, Marqakól, Tarbaǵatai aýdandarynan halyq toqtaýsyz kóship jatyr. Sol jaqqa halyqty qaitadan aparyp, turatyndai jaǵdai jasaý kerek. Ol úshin sol jaqqa adamdar turatyndai etip ekonomikalyq jaǵdai jasap, infraqurylymyn qalypqa keltirý qajet. Mysaly, Kúrshim aýdanyndaǵy Jaýǵashty, Zaisandaǵy Úidene, Tarbaǵataidaǵy Qandysý jáne Qarǵyba bógetteriniń bári apattyq jaǵdaida tur. Solardy jóndeý kerek», -deidi ol.
Ulttyq keńes múshesi shekaralyq aýdandardaǵy kóshtiń baǵytyn keri burý úshin zamanaýi igilikterdiń bárin aýylǵa ornatý kerektigin atady.
«Qazir shekaralyq aýdandarda nternet joq. Qytaidyń uialy bailanysy ǵana istep tur. Mine osyny qalypqa keltirý kerek. Ondai aýdandardyń bárin Qazaqstannyń aqparattyq aimaǵyna qaitadan engizý kerek. Iaǵni, olar qaitadan otandyq televidenieni kórip, Qazaqstannyń uialy operatorlarynyń qyzmetin tutynýy kerek. Jol salý da ózekti másele. Jergilikti joldardy kúrdeli jóndeýden ótkizip, asfalt tósep berý qajet. Sodan keiin ol jaqqa adamdardy kóshirý úshin úilerdi kóptep salyp, shetelden kelgen aǵaiyndarymyzdy turǵyzý máselesin qarastyrǵan durys dep oilaimyn. Eń negizgisi – kezinde jabylyp qalǵan Katonqaraǵai, Marqakól, Tarbaǵatai aýdandaryn qaita ashý kerek», - dedi Erlan Sairov.
