Saiasattanýshy Erlan Sairov jergilikti máslihattarda partiialardyń ókilderi belsendi jumys isteýdiń mańyzdy tusy týraly aitty, dep habarlaidy QazAqparat.
«2016 jyly Parlament sailaýy ótken kezde máslihattar quramyna «Aq jol», «Aýyl» partiialarynyń ókilderi engen bolatyn. Al búgingi kúnge keler bolsaq, oblystyq jáne aýdandyq deńgeidegi máslihattarda partiialardyń qatysý kórsetkishi joǵary bolar degen oidamyn. Bizdiń eldegi partiialar osy resýrstardy paidalana bilýi kerek. Bir ókinishtisi, kóptegen partiia máslihattardaǵy resýrsyn paidalana bermeidi», - dedi Erlan Sairov elordada ótken «SAILAU-2021: Parlament sailaýynyń aldyn ala qorytyndylary» atty saraptamalyq talqylaýda.
Onyń aitýynsha kez kelgen partiia bolsyn, qoǵamdyq uiym bolsyn eldiń damýyna, táýelsizdigin nyǵaitýǵa eńbek sińirýi kerek. Saiasattanýshynyń aitýynsha, bul – basty missiia.
«Ekinshi missiia – halyqtyń ál-aýqatyn kóterý. Halyqtyń ál-aýqatyn kóterý isimen jergilikti atqarýshy máslihattar quramynda da ainalysýǵa bolady. Qazaqstanda buǵan deiin qandai problema bar edi. Eldegi basty problema – óńirlerde (aýdandyq bolsyn, oblystyq bolsyn) qoǵamdyq-saiasi protses joq bolatyn. Osy protsesti qalyptastyryp, quryp, qalpyna keltirý kerek», - dedi ol.
