QR Kásipodaqtar federatsiiasy tóraǵasynyń orynbasary Erlan Sairov Elbasynyń Qazaqstan halqyna Joldaýy boiynsha óz pikirin bildirdi, dep habarlaidy QazAqparat agenttigi.
«Prezidenttiń Joldaýy optimistik mánge ie bolyp otyr. Qazaqstan álemdik ekonomikalyq keńistiktiń bóligi bolǵandyqtan, biz únemi álemdik áleýmettik-ekonomikalyq úrdisterdi saralap, onyń farvaterinde bolýymyz kerek. Álemde jappai tsifrlandyrý protsesi júrip jatyr. Osy oraida Qazaqstan bul iri ózgeristerge saqadai sai turýy tiis. Bul rette Prezidenttiń Joldaýy kóptegen máselelerdi qamtyp otyr», - dep toqtaldy E. Sairov.
Saiasattanýshynyń sózine qaraǵanda, qazirgi kezde dúniejúzinde áleýmettik-eńbek qatynastarynda eleýli ózgerister oryn alýda. Elimiz ozyq ózgeristerden qalyp qoimaýy úshin Tórtinshi ónerkásiptik revoliýtsiianyń qamtyp otyrǵan qadamdary óte mańyzdy bolyp otyr.
«Memleket tsifrlandyrý protsesterine airyqsha mán berip otyrǵany málim. Eger de búginde tsifrlyq tehnologiialardy ielenbesek, onda biz tarihi damýdan shetkeri qalatynymyz túsinikti», - dep naqtylady ol.
Budan bólek E. Sairov Prezident Joldaýynda adami kapitaldy damytýǵa erekshe ekpin qoiylyp otyrǵanyn, sondai-aq bul eń qajetti qadamnyń biri ekenin alǵa tartty.
«Adami kapital memlekettik ekonomikalyq ósimi men áleýmettik damýynyń basty talaby men irgetasy», - deidi saiasattanýshy.
Sonymen qatar ol muǵalimderdiń eleýli eńbegine laiyqty baǵa berilip otyrǵandyǵyn sóz etti.
«Joldaýda muǵalimderdiń eńbekaqysyn joǵarylatý týraly aitylǵan. Meniń oiymsha, bul baǵyttaǵy sheshim - Memleket basshysy Joldaýynyń mańyzdy aspektileriniń biri. Muǵalimder men oqytýshylardyń ómir súrý deńgeiine, moraldyq jaǵdaiyna kóp másele tyǵyz bailanysty. Olardyń eleýli eńbegine laiyqty baǵa berile bastady. Endi olardyń qoǵamdyq mártebesi turǵysyndaǵy jumysqa qyzý kirisý kerek. Bul rette azamattyq qoǵam men memlekettik birlesken is-qimylyna ekpin qoiǵan jón», - dep túiindedi sózin Erlan Sairov.
Aita keteiik, búgin jariialanǵan QR Prezidenti Nursultan Nazarbaevtyń Qazaqstan halqyna Joldaýynda ustazdar jalaqysyn arttyrý qadamdary eskerilgen.
«Muǵalim mártebesin arttyrý maqsatymen bilim berýdiń jańartylǵan mazmunyna kóshken ustazdardyń laýazymdyq jalaqysyn 2018 jyldyń 1 qańtarynan bastap 30 protsentke kóbeitýdi tapsyramyn. Jańartylǵan mazmun degenimiz - halyqaralyq standarttarǵa sai keletin jáne Nazarbaev ziiatkerlik mektepterinde beiimdelýden ótken zamanaýi oqý baǵdarlamalary. Bular bizdiń balalarymyzǵa qajetti fýnktsionaldyq saýattylyq pen syni turǵydan oilaý qabiletin darytady», - delingen Joldaýda.
.jpeg)