Búgin Parlament Májilisiniń jalpy otyrysynda depýtat Erlan Sairov QR Premer-Ministriniń orynbasary Eraly Toǵjanovtyń atyna joldaǵan saýalynda halyqtyń kedeiligi máselesin kóterdi, dep habarlaidy QazAqparat.
Depýtat atap ótkendei, Qazaqstan Prezidenti Qasym - Jomart Toqaev Úkimetke halyqtyń tabysyn arttyrý baǵdarlamasyn ázirleýdi tapsyrdy.
«Dúniejúzilik bank álemdegi kedeiliktiń eki shegin qarastyrǵan: tabysy ortashadan tómen elder úshin kúnine bir adamǵa 3,2 AQSh dollary, tabysy ortashadan joǵary elder úshin 5,5 AQSh dollary. Al Qazaqstanda eń tómengi kúnkóris deńgeii 2,8 dollardy quraidy, Reseide kúnine - 6 dollar. Eń tómengi kúnkóris deńgeii óte tómen bolǵannyń ózinde, 2021 jyly tabysy kúnkóris deńgeiinen tómen adamdar sany – resmi túrde 998 myń adam boldy. Al beiresmi sarapshylar bul kórsetkishtiń 1,5 mln, odan da joǵary ekenin aitady. Ómir kórsetkendei, halyqtyń kedeiligi memleketke óte qymbatqa túsedi!», - dedi E. Sairov.
Onyń paiymynsha, ishki jalpy ónimniń eselep ósýine qaramastan, Qazaqstan ondaǵan jyldar boiy kedeilik shegin kótermei keledi.
«Sonymen birge, pandemiia bastalǵannan beri turmysy tómen úi sharýashylyqtarynyń qarjysyna nuqsan keltiretin infliatsiianyń ósýine bailanysty áleýmettik tólemderdiń tiimdiligi tómendedi. Mysaly, Qazaqstanda halyqtyń eń az qamtylǵan 40 paiyzy óz biýdjetiniń 59 paiyzyn azyq-túlik ónimderine jumsaidy. Kei kezderi bul kórsetkish odan da joǵary. Elimizde azamattardyń tómen áleýmettik jaǵdaiynyń eki indikatory bar - eń tómengi kúnkóris shegi jáne kedeilik shegi. Kedeilik shegi, eń tómengi kúkóris sheginiń, iaǵni 36 myń teńgeniń 70 - paiyzyn quraidy. Bul - ertedegi Úkimetterdiń halyqqa aqshany az tóleý úshin istep qoiǵan «qýlyǵy». Iaǵni, áleýmettik kómek alǵyń kelse, «sińiri shyqqan» kedei bolýyń kerek! Osy tavtalogiianyń nátijesinde, 2020 jyly baǵanyń turaqty ósýine bailanysty áleýmettik kómekke suranys ósip, zárý adamdardyń sany artsa da, ataýly áleýmettik kómekpen qamtylǵan adamdardyń sany azaiǵan. Bul faktor óz kezeginde zárý azamattardyń áleýmettik jaǵdaiyn múldem turalatyp jiberdi», - dedi depýtat.
«Nur-Otan» partiiasynyń fraktsiiasy kedeilikpen kúresý úshin Úkimet mynadai sharalar qarastyrýy qajet dep esepteidi:
1. Eldegi jalpy ishki ónim deńgeiine, halyqaralyq standarttarǵa sáikes Qazaqstanda kedeilik shegin arttyrý. Qoǵam ishindegi kedeilik týraly kózqarasqa sáikes keletin, kedeiliktiń jańa anyqtamasyn engizý.
2. Eń tómengi kúnkóris shegi men kedeilik shegin biriktire otyryp, eń tómengi kúnkóris shegin arttyrý.
3. Eki eń tómengi jalaqy mólsherinde tabys alatyn azamattardy jeke tabys salyǵynan bosatý.
4. Eń tómengi jalaqyny jyl saiyn indeksatsiialaý máselesin sheshý.
5. Eń tómengi jalaqy alatyn azamattardyń jumyssyzdyq boiynsha saqtandyrý somasyn arttyrý arqyly saqtandyrý júiesin jetildirý.
