Parlament Májilisiniń jalpy otyrysynda depýtat Erlan Sairov aýyl turǵyndarynyń kásibin qarjylandyrý boiynsha Úkimet basshysy Asqar Maminniń atyna saýal joldady, dep habarlaidy "Ult aqparat".
«Halyqtyń kedeiligi ulttyq qaýipsizdikke tikelei keri áser etetin basty problema! Asa ózekti másele - aýyldaǵy kedeilik. «Nur Otan» partiiasy «áleýmettik muqtaj adamdar máselesin ekonomikalyq turǵyda sheshý mańyzdy» dep esepteidi. Bul máseleni sheshýdiń ońtaily ádisi ál-aýqaty tómen azamattardy mikrokreditpen qamtamasyz ete otyryp, adamdardyń biznes-saýatyn arttyrý. Prezident Kasym-Jomart Kemeluly Toqaev óziniń Úkimetke bergen tapsyrmasynda mikrokredit problemasyna basa nazar aýdardy. Endi máseleni Úkimet qalai sheshedi degen suraq týady», - dedi depýtat.
Onyń aitýynsha, «Eńbek» baǵdarlamasynyń nesielendirý baǵyty boiynsha 2020 jyly aýyl turǵyndaryna 43,3 mlrd teńgege 11 294 nesie berildi. Osy baǵdarlama aiasyndaǵy biyldyń biýdjeti 20 mlrd teńgeni ǵana qurap otyr. Iaǵni, biyl shaǵyn nesie alýshylardyń sany 5200-ge azaiady.
«Pandemiia kezinde, Ulttyq ekonomika jáne Eńbek jáne halyqty áleýmettik qorǵaý ministrlikteriniń keri pozitsiiasy bizge túsiniksiz», - dedi Sairov.
Onyń paiymynsha, mikrokreditteýdegi basty problema - kepilzat máselesi. Bul problemany nesiege kepildik berý mehanizmin engizý arqyly naqty sheshetin ýaqyt jetti.
«Biyl Atameken jáne jergilikti ákimdikterdiń qatysýymen shaǵyn nesie uiymdaryn ashý josparlanyp otyr. Niet durys, biraq óziniń tiimdiligin kórsete bilgen, ońtaily jumys istep turǵan, 10 jyl shaǵyn nesie berý tájiribesi bar aýyl sharýshalyǵyn qarjylai qoldaý qory ne sebepti jabylmaq? Memleket, qarapaiym halyq múddesi turǵysynan qordy saqtaý qajet! Óitkeni, ózderi qinalyp otyrǵan aýyldaǵy usaq sharýalar men zárý adamdar qarjy kózinen múldemge qaǵylý qaýpi basym. Aýylda mikro-biznesti damytýdyń basty aspektisi tutyný jáne qyzmet kórsetý kooperativterin qurý. Halyqaralyq tájiribede bul kooperativter ónimdi óńdeý, ótkizýge kómektesý, veterinariia, mal azyǵyn daiyndaý, ozyq bilim taratýmen ainalysady. Osyndai kooperativterdi, ásirese, shalǵai eldi mekenderde qurý óte ózekti», - dedi depýtat.
«Bul jóninde de Prezident Toqaev «birneshe aimaqtarda «egistikten sórege deiin» kooperatsiialyq tizbek» jasaý jóninde naqty tapsyrma bergen. Osy bastama boiynsha 2 mln aýyl turǵynynyń kirisin ósirý qarastyrylǵan. Búginde bul tapsyrma formaldy oryndaldy, qarjy kózi zárý adamdarǵa jetpedi degen pikir bar. Aýyl sharýashylyǵy ministrligi osy bastama boiynsha qansha zárý adamǵa naqty kómek kórsetildi degen esep bergeni abzal», - dedi Erlan Sairov.
