Memlekettik keńesshi Erlan Qarin áleýmettik jelide qyzý talqylanyp jatqan Jetisai aýdanyndaǵy toida aitylǵan daýly ýaǵyzǵa qatysty pikir bildirdi, dep habarlaidy ult.kz.
Buǵan deiin áleýmettik jelilerde toida sóz alǵan qariianyń jas jubailarǵa tilek aitýdyń ornyna dini ýaǵyz aityp, toilarda mýzykany alyp tastaý, erler men áielderdi bólek otyrǵyzý qajettigin aitqan videosy keńinen taraǵan bolatyn. Sondai-aq ol ánshilerdi «shaitannyń azanshysy» dep atap, áielderge qatysty aitqan sózderi de qoǵamda synǵa ushyrady.
Osyǵan bailanysty Erlan Qarin mundai pikirlerdiń ulttyq bolmysqa da, Qazaqstannyń zaiyrly damý qaǵidattaryna da sáikes kelmeitinin atap ótti.
«Qazaqstan – zaiyrly memleket. Bizdiń temirqazyǵymyz – Konstitýtsiia. Birinshi orynda dini shekteýler emes, elimizdiń zańdary turady», – dep jazdy Memlekettik keńesshi.
Ol sondai-aq óner men mádenietti dinge qarsy qoiýdy asyra silteýshilik dep baǵalap, Qazaqstannyń damý baǵyty bilimge, ǵylymǵa, óner men mádenietke negizdelgenin aitty.
Erlan Qarinniń pikirinshe, kópshilik aldynda adamdardy kemsitý, áielderdi alalaý nemese óz kózqarasyn ózgelerge kúshtep tańý qoǵamdaǵy ádep normalaryna qaishy keledi.
«Biz ózara qurmet pen mádenietti biik qoiamyz. Elimizdiń jańa qoǵamdyq etikany qalyptastyrýǵa erekshe mán berip otyrǵany da sondyqtan. Ulttyq bolmys pen eldik ustanymdarǵa qaishy keletin mundai áreketterge qoǵam bolyp tosqaýyl qoiýymyz qajet», – dedi ol.
Aita keteiik, Jetisaidaǵy toida aitylǵan sózder áleýmettik jeli qoldanýshylary arasynda qyzý pikirtalas týǵyzdy. Biri qariianyń dini kózqarasyn qoldasa, endi biri toi siiaqty qýanyshta mundai ýaǵyz aitýdy jáne áielder men óner ókilderine qatysty aitylǵan pikirlerdi orynsyz dep baǵalady.
