Foto: Akorda.kz
Erlan Qoshanov Májilis tóraǵasy bolyp qaita sailandy, dep habarlaidy "Ult aqparat".
Plenarly otyrysta jańadan sailanǵan depýtattar ant bergennen keiin tómengi palata tóraǵalyǵyna Erlan Qoshanovtyń kandidatýrasy usynyldy. Tóraǵa laýazymyna úmitkerler boiynsha basqa usynystar túsken joq.
Sanaq komissiiasynyń hatshysy Natalia Dementeva Parlament Májilisiniń tóraǵasyn sailaý boiynsha jasyryn daýys berýdiń tártibi týraly aitty. Artynsha depýtattarǵa biýlletender taratylyp berdi. Olar usynylǵan kandidatty qoldap nemese qarsy bolyp daýys beredi. Belgilenbegen biýlletender jaramsyz bolyp sanalady. Daýys berýge 20 minýt berildi.
Keiin sanaq komissiiasynyń tóraǵasy Janarbek Áshimjan nátijeni jariialady.
«Daýys berý úshin depýtattarǵa 98 biýlleten berildi. Jaqtaǵandar - 98, qarsy bolǵandar - joq. Májilis tóraǵasyn sailaý boiynsha Erlan Qoshanovqa daýys berýdiń hattamasy usynyldy», - dedi ol.
Sonymen qatar Májilistiń jalpy otyrysynda palata tóraǵasynyń orynbasarlary sailandy. Spiker Erlan Qoshanov bul laýazymǵa "amanattyq" Albert Raý men "Aq jol" ókili Daniia Espaevanyń kandidatýralaryn usyndy. Tómengi palata músheleri eki kandidatýrany da qoldap daýys berdi.
Eske salaiyq, Albert Raý - Májilistiń VI jáne VII shaqyrylymdarynyń depýtaty. Sońǵy shaqyrylymda Ekonomikalyq reforma jáne óńirlik damý komitetiniń tóraǵasy qyzmetin atqarǵan.
Al Daniia Mádiqyzy - Májilistiń VII shaqyrylymynyń depýtaty. 2019 jylǵy sailaýda prezidenttikke kandidat boldy. Depýtattyq qyzmetke deiin 1982 jyldan bastap bank júiesinde jumys istegen. Bankterdegi jalpy eńbek ótili - 34 jyl, onyń 17 jyly basshylyq qyzmetterde bolǵan.
