Qaraǵandy obysynda alǵash ret turǵyn úi qurylysy aýdandaryna kommýnikatsiia ótkizýge 2 mlrd teńgeden astam qarajat jumsalady, dep habarlaidy "Ult aqparat" oblys ákimdiginiń baspasóz qyzmetine silteme jasap.
«Nurly Jer» baǵdarlamasyn júzege asyrýdyń basym baǵyttarynyń biri - jeke turǵyn úi qurylysyn damytý. Jergilikti atqarýshy bilik qurylys aýdandaryna injenerlik-kommýnikatsiialyq infraqurylym (IKI) ótkizýdi qamtamasyz etýge mindetti.
Qaraǵandy oblysynyń ákimi Erlan Qoshanov bul jumystardy baqylaýda ustap otyr. Oǵan qatysty esep kezekti apparattyq jinalysta tyńdaldy.
- Qosymsha bólingen qarajatty eskere kele, búgingi tańda oblysta IKI ótkizýdi qarjylandyrý 2,1 mlrd teńgeni quraidy, - dep habarlady oblys ákiminiń birinshi orynbasary Asylbek Dúisebaev.
Jezqazǵanda biylǵy jyly 670 jer ýchaskileri tapsyryldy. Alaida ótken jyldary ótinish berýshiler kezekke turarda JSN belgilemegendikten, rásimdeýge qatysty qiyndyqtar týyndady. Qazir olardyń zańdy ekendikterin tekserý júrgizilýde.
Qaraǵandyda 3500-ge jýyq jer ýchaskilerin tapsyrý josparlanǵan, onyń ishinde jańalary – 756, osyǵan deiin berilgenderi – 2700-den asady. Olarǵa kommýnikatsiialar ótkiziledi.
Apparattyq jinalysta Balqash qalasynyń basyshylyǵy synǵa alyndy. Munda IKI ótkizýge qajetti soma tabylmaǵan. Degenmen ótken jyly qala basshylyǵy jol jóndeýge bólingen qarajatty igere almai, oblystyq qazynaǵa qaitarǵan bolatyn. Osy sebepti jeke turǵyn úi qurylysyn damytýǵa qatysty problemalar qalyp otyr.
- Bul máseleni zerttep shyǵyp, kimniń kinásinen bolǵanyn balqashtyqtarǵa jariialaý kerek. Ádemi sóilei bilý – jaqsy jumys isteýmen teń emes, - dep narazylyǵyn bildirdi Erlan Qoshanov.
