Búgin «Qazaqstan» Ulttyq telearnasynyń Jańa jylǵa daiyndaǵan baǵdarlamalarynyń tanystyrylymy ótti, dep habarlaidy ortcom.kz.
Mereke qarsańyndaǵy apta máńgilik mahabbat jaily ańyz negizinde túsirilgen «Qozy Kórpesh - Baian Sulý» atty 6 bólimdi kórkem telehikaianyń tusaýkeserinen bastalady.
«31 jeltoqsan saǵat 22:30-da tanymal shoý-biznes juldyzdarynyń qatysýymen jańa jyldyq siqyrǵa toly «Syńǵyrlaǵan siqyrlar» merekelik shoý-baǵdarlamasy efirge jol tartady. Atalǵan jobaǵa, Kámshat Joldybaeva, Aigúl Imanbaeva, Búrkit, Áli Oqapov, Aiqyn Tólepbergenov, Kesh You, Qanat Úmbetov, Áliia Ábiken, Tóreǵali Tóreáli, Oljas Abai jáne «Qazaqstan» arnasynyń tanymal júrgizýshileri Janserik Beiseev, Aisulý Ryspanova, Irina Ten, Baian Baqkeldiqyzy, Nartai Aralbaiuly qatysady. Eń kishkentai telekórermenderimiz úshin 31 jeltoqsan saǵat 12.35-te áigili «Walt Disney» kinokompaniiasynyń qazaq tilinde dýbliajdalǵan «Rapýntsel» mýltfilmi kórsetiletin bolady», - dedi «Qazaqstan» teleradiokorporatsiiasynyń basshysy Erlan Qarin.
Sonymen qatar ol mereke kúnderi «Men qazaqpyn» halyqaralyq megajobasynyń gala-kontsertiniń qaitalaýy bolatynyn jáne kórermenge merekelik kontsertter usynylatynyn aityp ótti.
«25-29 jeltoqsan aralyǵynda kúndelikti saǵat 21.45-te Ulttyq arna kórermeni qazaq mádenieti men óneriniń uly murasynyń ekranizatsiiasyn tamashalai alady. Senbi kúni, 30 jeltoqsanda, saǵat 20.00-de kásipkerliktiń qyr-syryn ashyp, biznestiń ońtaily jolyn kórsetken «Úmitker» realiti-shoýynyń aqtyq shyǵarylymy ótedi. Sondai-aq, jańa jyldyq jobalardyń arasynda «Ázil álemi», «Tamasha» ázil teatrynyń 90-shy jyldary túsirilgen eń úzdik toptamalary, elimizdiń tanymal vainerleri, videoblogerleri men qoǵam qairatkerleriniń qatysýymen ótetin arnaiy «HA-HA shoý: Jańa Jyl 2018» jobasy kórermenge jol tartady», - dedi ol.
