QR Prezidentiniń keńesshisi Erlan Qarin Senat qabyldaǵan saiasi partiialar men sailaý týraly zańǵa pikir bildirdi, dep habarlaidy "Ult aqparat".
«Búgin Senat saiasi partiialar jáne sailaý týraly zańǵa túzetýlerdi qabyldady. Oǵan sáikes, saiasi partiialardy tirkeý barysyndaǵy kedergiler 2 ese qysqarady jáne partiialyq sailaý tiziminde áielder men jastarǵa 30 paiyz mindetti kvota engiziledi. Bul ózgeristerge 2019 jyly jeltoqsanda ótken Ulttyq keńestiń 2-otyrysyndaǵy saiasi reformalar toptamasy aiasynda Prezident Qasym-Jomart Toqaev bastama jasaǵan edi. Mine, búgin osynaý jańa normalardy senatorlar maquldady», - dep jazdy ol Facebook paraqshasynda.
Onyń atap ótýinshe, atalǵan normalar baiypty saiasi jańashyldyq sanalady. Aitalyq, máslihattardaǵy 3 335 orynnyń tek 740-ynda ǵana áielder mandatqa ie bolǵan.
«Al 29 jasqa tolmaǵan jas depýtattardyń sany - nebári 53 qana. Senator Lázzat Súleimenniń aitýynsha, onyń 44-i aýdandyq máslihatta bolsa, oblystyq máslihattarda múldem joq desek te bolady. Sondyqtan bul normalar áielder men jastardy eldiń qoǵamdyq-saiasi protsesterine barynsha keńinen ári belsendi tartýǵa septigin tigizedi», - dedi Erlan Karin.
Esterińizge sala ketsek, búgin Parlament Senatynyń jalpy otyrysynda «Qazaqstan Respýblikasyndaǵy sailaý týraly» Konstitýtsiialyq zańǵa tolyqtyrýlar engizý týraly» Konstitýtsiialyq zań men «Saiasi partiialar týraly» zańyna ózgeris pen tolyqtyrýlar engizý týraly» zań qabyldandy.
