Taiaýda "Qazaqstan" RTRK" AQ Basqarma tóraǵasy Erlan Qarin ózine artqan senimi men úmiti úshin Memleket basshysy Nursultan Nazarbaevqa alǵys aitty, - dep habarlaidy "Ult aqparat". Bul týraly ol Facebook áleýmettik jelisindegi paraqshasynda jazdy.
"Qurmetti dostar! "Qazaqstan" Teleradiokorporatsiiasy - Qazaq aqparat keńistiginiń qara shańyraǵy. Bul jerde Qazaq rýhaniiatyna qyzmet atqarǵan, elimizdiń aqparat salasyna eńbegi sińgen kóptegen áigili tulǵalar, qazaq jýrnalistikasynyń maitalmandary qyzmet atqardy. Elimizdegi eń iri media qurylymda qyzmet atqarý - birneshe urpaqtyń taǵdyryna jalǵasqan sabaqtastyqty kótere bilý, ári iisi qazaqtyń aldynda jaýapkershilik júgin arqalaýmen teń. Eń aldymen, osyndai jaýapty jumysty senim artyp tapsyrǵan Elbasyǵa alǵys aitqym keledi. Qandai qyzmette bolsam da Elbasynyń qoldaýyn, demeýin kórip kelemin. Bul joly da Memleket basshysynyń seniminen shyǵýǵa tyrysamyn", - dep jazdy Erlan Qarin.
Sonymen qatar, ol korporatsiia quramy óte úlken ekenin, jalpy sany 2 myńnan astam adam qyzmet etetinin eske saldy. "Qazaqstan" Ulttyq telearnasy, "KAZsport" telearnasy, "Balapan" telearnasy, Qazaq radiosy, "Shalqar" radiosy, "Astana" radiosy, Class ic radiosy sekildi óz aýditoriiasyn qalyptastyrǵan, kórermenderi men tyńdarmandaryna sapaly kontent usynyp kele jatqan úlken jobalar. Odan bólek aimaqtyq arnamyz ben birneshe internet sait jumys isteidi", - dep jazdy ol.
Aitýynsha, teleradio kesheni buǵan deiin de jýrnalistikanyń, aǵartýshylyqtyń, el damýyndaǵy biik jetistikterdi kórermen qaýymǵa jetkizýdiń biregei qainary bolyp keldi. "Aldymyzda ujymnyń jumysyn odan ári jetildirý, dástúrin saqtaý arqyly zamana kóshine ilesip, talǵampaz kórermenderdiń údesinen shyǵý, búgingi medianyń barlyq talaptaryna jaýap berý mindeti tur. QR Aqparat jáne kommýnikatsiia ministri Dáýren Abaev myrza teleradiokorporatsiianyń aldynda naqty jańa basymdyqtardy aiqyndady", - degen ol júktelgen jańa mindetterdi atqarýǵa bar kúshin salatynyn aitty.
"Maǵan senim artyp, qoldaý bildirgen barsha dostaryma, buǵan deiin qyzmettes, áriptes bolǵan barlyq jandarǵa alǵys aitamyn. QSZI ujymyna, osy sala boiynsha áriptes bolǵan tulǵalarǵa erekshe rizashylyǵymdy bildiremin. QR Prezidenti janyndaǵy Strategiialyq zertteýler institýtynda eki jarym jyl ishinde áriptesterdiń tabandylyǵy men kásibiliginiń arqasynda tabysty jumystar atqardyq. Aldaǵy ýaqytta da áriptestik bailanysta bolamyz degen senimdemin", - dedi "Qazaqstan" RTRK" AQ basqarma tóraǵasy.
Eske salaiyq, Erlan Qarin keshe, 9 aqpanda "Qazaqstan" RTRK" AQ Basqarma tóraǵasy qyzmetine taǵaiyndalǵan bolatyn.
