Telefonnan kóz almaityn qazirgi jas býynnyń sanasyna Abai taǵylymyn sińirýimiz kerek.
Nur Sultan qalalyq ákimdiginiń Memlekettik akademiialyq filarmoniiasynyń bas direktory Erlan Dákenov uly oishyldyń mereitoiy aldynda osyndai pikir bildirdi, dep habarlaidy QazAqparat7
«Kúni keshe el Prezidenti Qasym-Jomart Toqaevtyń «Abai jáne XXI ǵasyrdaǵy Qazaqstan» atty maqalasy jaryq kórdi. Bul eńbek - uly oishyl Abaidyń mol murasyn búkil jurtqa pash etýdiń, kemeńgerdiń 175 jyldyǵyn joǵary deńgeide atap ótýdiń kilti dep bilemin. Prezident bizge jol siltei otyra, Abai shyǵarmalarynyń qundylyqtaryn mynaý damyǵan zamanmen salystyrady. Órkenietti elderdiń aldynda qazaq bilimdi, bilikti, ǵylymnyń damýyna úles qosýy qajettigin aitady. Buǵan barlyq el bolyp jumyla kirisýimiz qajet. Ásirese, kúni-túni kózin telefonnan almaityn bolashaq urpaqty tárbieleýimiz kerek. Boilaryna Abaidan qalǵan asyl murany sińirý shart. Óitkeni, jumyla kótergen júktiń qashan da jeńil ekeni haq», - deidi Erlan Dákenov.
Onyń aitýynsha, jastardyń boiynda patriottyq sezimdi, olardyń tarihqa degen qulshynysyn oiatý úshin filarmoniia Abaidyń mýzyka álemine qosqan ólsheýsiz úlesin dáriptep keledi. Búgin de kompozitordyń áýezdi ánderi Memlekettik akademiialyq filarmoniianyń repertýarynda oiyp turyp oryn alǵan.
«Sondai-aq, Abaidyń 175 jyldyq mereitoiy aiasynda óner ordasynyń ujymy, iaǵni 700 qyzmetker «Kózimniń qarasy» shyǵarmasyn oryndaý boiynsha chellendj uiymdastyrdy. Bul aýqymdy estafeta elimizdiń barlyq aimaǵynda jalǵasyn tapty. Abaidyń murasyn, taǵylymyn jas urpaqqa jetkizý baǵytynda eńbegimiz jalǵasady. Kemel oidyń kemeńgeri Abai Qunanbaiulynyń esimi eshqashan ólmek emes. Ony búgingi urpaq ulyqtai beredi», - deidi ol.
Eske sala ketsek, «Egemen Qazaqstan» gazetinde QR Prezidenti Qasym-Jomart Toqaevtyń «Abai jáne HHI ǵasyrdaǵy Qazaqstan» atty maqalasy jariialanǵan bolatyn.
