Muhtar Áýezov atyndaǵy Qazaq drama teatrynyń direktory Erlan Bilálge qatysty sot úkimi shyqty, - dep habarlaidy Tengrinews.kz.
Almatynyń Almaly aýdandyq sotynda QR eńbek sińirgen qairatkeri Erlan Bilálge qatysty sot úkimi shyǵaryldy.
"Sot Erlan Biláldi QR Qylmystyq kodeksiniń 24-babynyń 3-bóligi jáne 366-baby boiynsha aiypty dep tanyp, 52 500 000 teńge kóleminde aiyppul salý týraly úkim shyǵarady", - dep oqydy úkimdi sýdia.
Sondai-aq, sot Biláldi memlekettik qyzmetterge ornalasý quqyǵynan ómir boiyna aiyrdy. Munymen qatar, sýdia sottalýshynyń "Qazaqstannyń eńbek sińirgen qairatkeri" ataǵynan aiyrý týraly usynys joldanatynyn málimdedi.
Oǵan QR Qylmystyq kodeksiniń 24-babynyń 3-bóligi jáne 366-babynyń 2-bóligi "Para alýǵa oqtalý" boiynsha aiyp taǵyldy. Sotqa deiingi tergeý organynyń málimeti boiynsha, Bilál "Sezam" qoǵamdyq qaiyrymdylyq shyǵarmashylyq qorynyń prezidenti Qairat Baianovtan Áýezov teatrynyń qabyrǵasynda jańajyldyq qoiylymdar qoiý úshin 1,5 million teńge para almaq bolǵan.
Sotta sýdia Qýanysh Áripov tórelik etti. Munyń aldynda Erlan Bilál qylmysyn moiyndaǵan bolatyn. "Syiaqy týraly kelistik, sosyn 2 qańtarda kezdesip, ol maǵan 600 myń teńge berdi. Ekinshi ret 4 qańtarda 900 myń teńge berdi de, men sol kúni ustaldym. Kinámdi tolyq moiyndaimyn, ókinish bildiremin. Basynda Baianov maǵan ózi usynǵan. Bizde jylda shyrshalar, qoiylymdar ótedi. Ózi keldi. Qazaqsha aitqanda rizalyǵyn bildirý úshin. Basynda somany da ózi aitqan bolatyn. 600 myńdy qaida jaratqanym esimde joq, qaryzdarymdy qaitaryp júrgenmin. Eshkim qysym jasaǵan joq, kinámdi ózim moiyndadym", - degen edi Erlan Bilál sot otyrysy kezinde.
Aita keteiik, Erlan Biláldiń advokaty istiń BAQ ókilderiniń qatysýynsyz ótýin suraǵan edi. Sýdia taraptar pikirin tyńdap, aýdiojazbaǵa, sýretke jáne videoǵa túsirýge tyiym saldy. Munyń aldynda sot Erlan Biláldi kepilmen bosatqan edi. Ol 1 million 205 myń teńge kóleminde kepil somasyn berdi.
Eske salaiyq, 5 qańtarda QR eńbek sińirgen qairatkeri, akter, M. Áýezov atyndaǵy Qazaq memlekettik akademiialyq drama teatry basshysy Erlan Bilálov 1,5 million teńge paramen ustalǵany habarlanǵan bolatyn. Kinásin tolyq moiyndaýyna bailanysty Erlan Bilálov qamaýǵa lalynbady. Osydan keiin 9 qańtarda Áýezov teatry direktory mindetin atqarýshy taǵaiyndalǵan. Al 17 qańtarda Erlan Biláldiń isi sotqa túsken edi.
