Almaly aýdandyq sotynda Qazaqstan Respýblikasynyń eńbek sińirgen qairatkeri, M. Áýezov atyndaǵy drama teatrynyń direktory Erlan Bilálge qatysty kezekti sot otyrysy ótti, dep habarlaidy «QazAqparat».
Erlan Biláldiń qorǵaýshysy taǵy da isti BAQ-tyń qatysýynsyz qaraý týraly ótinish bildirdi. Osy is boiynsha kýáger bolyp otyrǵan Qairat Baianovtyń qorǵaýshysy ony azamattyq talap qoiýshy dep tanýdy surady.
«Biz Baianovty qylmystyq protseste azamattyq talap qoiýshy dep taný týraly ótinish berdik. Aiyptaý aktisimen belgilengen, onyń ústine aiyptalýshynyń ózi de joqqa shyǵarmai otyrǵan jait, ol Baianovtan 600 myń teńge mólsherinde aqsha alǵan. Biz bul aqshany iesine qaitarý týraly azamattyq talap qoidyq. Jalpy shyǵyn mólsheri 600 myń teńge - Baianov óz qarajattary esebinen bergen soma. Ol qylmystyq istiń materialdaryna qosylǵan joq. Biz, sondai-aq Baianovqa keltirilgen múliktik zalaldy da qostyq, qorǵaýshy shyǵynyna 50 myń teńge, osy iske qatysty kýágerge júktelgen ózge shyǵyndar úshin 21 myń teńge. Osy qarajatty óteýdi suraimyz», - dedi jýrnalisterge Qairat Baianovtyń qorǵaýshysy Ramilia Muhamedieva sot otyrysynan keiin.
Eske sala keteiik, jýrnalisterdiń aýdiojazba, foto-videotúsirilimder júrgizýine tyiym salynǵan. Biraq olarǵa protseske qatysýǵa ruqsat berilgen. Sotqa sýdia Qýanysh Aripov tórelik etýde. Sotqa deiingi tergep-tekserý organynyń málimetterine qaraǵanda, Erlan Bilál «Sezam» qoǵamdyq qaiyrymdylyq shyǵarmashylyq qorynyń prezidenti Qairat Baianovtan M. Áýezov atyndaǵy drama teatrynda jańajyldyq spektaklder ótkizý úshin 1,5 million teńge mólsherinde para almaq bolǵan.
Qairat Baianov iske ázirshe kýáger retinde qatysyp otyr.
Eske sala keteiik, M. Áýezov atyndaǵy Qazaq memlekettik akademiialyq drama teatrynyń direktory Erlan Bilál 1,5 mln teńge mólsherinde para almaq bolǵan jerinde ustalǵan. Oǵan qatysty QR QK 366-babynyń («Para alý») 2-bóligine, 24-babynyń 3-bóligine sáikes is qozǵaldy. Buryn sot Erlan Bilálge bultartpaý sharasyn qoldanyp, kepilmen bosatqan bolatyn. Ol 1 million 205 myń teńge mólsherinde kepil tóledi.
