«Esquire» jýrnalyna suhbat bergen Erkin Tátishev aǵasynyń qazasy jaily, ádildik pen shyndyq izdegen 14 jyl jaily aityp beripti. Tipti, «Tátishevterge joǵarǵy jaq nusqaý berip otyr» degen alyp-qashpa áńgimege de jaýap bergen eken.
«Áiteýir, bizdikilerge joǵary jaq aityp, jol siltep berýi kerek siiaqty kórinedi de turady. Al bul jerde qylmys bary anyq. Uiymdasqan túrde kisi ólimi jasalǵan. Onyń quramynda iri-iri adamdar boldy. Ol adamdardyń jemqorlyq, urlyq sekildi basqa da qylmystary óz bastarynan jetip artylatyny taǵy ras», - depti Erkin Tátishev.
Erkinniń aitýynsha, 20107 jyly Murathan Toqmadidiń kúndeligi tabylǵan eken. Toqmadi sol jerde Erjan Tátishevtiń senimine qalai kirýi kerektigi men aldaǵy josparlary jaily jazǵan eken.
«Tergeýshilerdiń ózderi ań-tań boldy. Iá, qatyryp eshteńe jazbaǵan. Toqmadi Túrgenov emes qoi. Degenmen, naqty ýaqyty, ańǵa shyǵý, bankten nesie alý t.s.s. josparlary jazylǵan», - deidi marqumnyń inisi.
Erkinniń aitýynsha, bultartpas dálelder keltirilgen soń da, Murathan Toqmadige kinásin moiyndaýǵa týra kelgen. Tipti, shynaiy tergeý, tekseris Erjan Tátishevtiń qazasynan 6 jyldan keiin ǵana qolǵa alynypty.
«2008 jyly maǵyn ofitserler kelip: «Erkin, biz bul isti tergemekpiz. Bilemiz, bunyń artynda komitettiń adamdary turýy múmkin» dedi. Men sol kezdiń ózinde-aq, istiń artynda Dútbaevtyń turǵanyn sezdim. Ol jeke bastyń sharýasy emes, oǵan Erjandy óltirý týraly tapsyrys túsken. Ol tipti 2002 jyly Erjandy óltirýge bekingen. Ol kezde Áblázov túrmede otyrǵan. Bul oǵan alibi bolatyn edi», - deidi.
Oǵan qosa, Erkin Tátishev Áblázov-Dútbaev jáne Jákishev úshtigi jaily da aityp beripti.
«Dútbaev pen Jákishev jaqsy dos bolǵan. Sosyn Jákishev Dútbaev pen Áblázovtiń qarym-qatynas ornatýyna sebepshi boldy. Ol kezde Muhtar Qazatompromda qyzmette edi. Óziniń mansabyn da paidalanǵan», - deidi Tátishev.
Tátishevtiń týǵandary ne úshin osy kúnge deiin úndegen joq? Erkin Bas prokýratýra men UQK basshylyǵyna azyrdanyp, isti ashýyn talap etkeni jaily aitypty.
«Bul jerde másele Áblázov emes, Dútbaev jaily. Ol Áblázovti qalqan qarýy tutty. Oǵan qansha ret kómektesti. Kúieýbalalaryn jiberdi. Shynynda UQK burynǵy basshysyna is qozǵaý úshin adamǵa batyldyq kerek. 2016 jyly basshylqqa Kárim Másimov kelgennen keiin istiń aýany ózgere bastady. Másimov saiasi erik-jigeri bar adam. Men qaita shaǵymdandym. «Biz kóreiik. Isti qaraimyz» dep jaýap berdi Másimov. Ári qarai, ýaqyt pen resýrstyń, tehnikanyń, dálelderdi tabýdyń joly ǵana qalǵan.qudaiǵa shúkir, tapty. Al ne úshin óldirdi degenge kelsek, jaýaby qarapaiym. Ol barlyǵynan aiyrylǵan», - deidi Erkin.
Aitpaqshy, qaitys bolǵan Erjan Tátishevke túrmege túser aldynda Áblázov BTA bankti aýdaryp berip, keiin qaitaryp berýin suraǵan. Oǵan kónbegen Erjandy tapsyryp berip óltirtken degen boljam aitylǵan edi. Erkin bul jaily da óz pikirin aitypty.
«Bul Muhtardyń ózi taratyp júrgen qaýeset. Ol saiasi suqit. Ol kez kelgen faktini alyp, ózine yńǵailastyryp alady. Ol ótirik aitýdyń sheberi. Ol Erjan jaily ne demedi osy kúnge deiin», - depti.
Baýyrynyń qazasy bolǵan kún týraly Erkin bylai deidi:
«Erjandy moraldy túrde kúidirý – tapsyrma boldy. Adam sharshaǵan kezde demalǵysy keledi ǵoi. Al meniń baýyrym ańshylyqty jaqsy kóretin. Al ol jaqta qaqpan daiyn turǵan. Tipti, Murathanǵa 2 million tólegen. Aqsha qaltada. Endi isti tyndyrý ǵana qalǵan», - deidi Erkin Tátishev.
«Bul oqiǵa jeltoqsanda boldy. Al qyrkúiekte meniń ústimnen jasyryn is qozǵapty Dútbaev. Sóitip, Erjandy óltirgen soń, meni buǵattamaq bolǵan ǵoi. Men muny túsindim. Qazir birdeńe desem, bitti, kúiip ketetin túrim bar. Sondyqtan, ýaqyt kelgenin kútip jattym. Bul júieli túrde, egjei-tegjeili eseptelgen jumys. Bul týraly men de, meniń marqum baýyrym da bilgen joqpyz. Osynyń barlyǵynyń artynda Dútbaev turdy. Sondyqtan, biz erterek tergeýdi talap ete almadyq. Bul múmkin emes edi. Biz ádildik ornaýyn 14 jyl kúttik», - dep túiindeidi Erkin Tátishev.
Abai.kz
