Otandyq meditsinany tsifrlandyrýdyń segiz jyly kezekti milliardtyq bekitýler (pripiska) men biýdjet qarajatyn jymqyrý shemasyna alyp keldi, dep habarlaidy hronika.kz.
Bul oqiǵanyń basty keiipkeri — astanalyq androlog-dáriger Boris Chen jáne oǵan tiesili «Astana Clinic» men «Klinika Panatseia» JShS. 2023 jyldyń sáýiri men 2024 jyldyń jeltoqsany aralyǵynda «MedElement» júiesi arqyly onyń «Salamatty Qazaqstan» jyljymaly poiyzy Mindetti áleýmettik meditsinalyq saqtandyrý qorynan (MÁMS) 682,9 mln teńge igergen.
Memlekettik aýdit tekserýi soraqy shyndyqtyń betin ashty: shalǵai aýyldardy aralaǵan dáriger er adamdarǵa «jatyr obyry» men ózge de ginekologiialyq aýrýlar boiynsha diagnoz qoiyp, «em júrgizgen». Klinika qyzmetkerleri poiyzdyń tek ótirik esepter úshin jumys istegenin jáne basshynyń ár reis saiyn qaltasyna 100 mln teńgege deiin basyp otyrǵanyn moiyndady.
Halyqtyń aqshasy qaida ketti?
Tintý kezinde B.Chenniń jubaiynyń atyna jazylǵan Ispaniianyń Valensiia qalasynan 500 myń evroǵa alynǵan záýlim úidiń kelisimsharty tabyldy. Qarajat klinika esepshotynan júzdegen million teńge bolyp qolma-qol sheshilip otyrǵan. Sonymen qatar, júrgizýshisiniń atyna rásimdelgen Lexus LX 570 jol talǵamaityn kóligi de anyqtaldy.
Sot sheshimi:
Astana qalasynyń aýdanaralyq soty alaiaqtyq jasaǵan dárigerdi 5 jylǵa bas bostandyǵynan aiyrdy. Ispaniiadaǵy villa men sándi avtokólik memleket kirisine tárkilendi.
Densaýlyq saqtaý ministrligi ne deidi?
Dáriger sot úkimin tyńdap jatqanda, Densaýlyq saqtaý men Tsifrlyq damý ministrlikteri Premer-ministr Bektenovke bekitýlerdi túbegeili joiatyn «Biryńǵai aqparattyq júie qurý» týraly esep berip jatqan edi. Elimizde mundai jalǵan patsientter júiesimen kúres 2018 jyldan beri júrgizilip keledi, biraq ol jyl saiyn damyp, endi óńiraralyq deńgeige jetti. Al Ministrliktiń ózinde «erlerdegi ginekologiialyq aýrýlarǵa» aktilerge qol qoiǵan sheneýnikterdiń qashan jaýapqa tartylatyny týraly saýalǵa resmi tulǵalar áli jaýap bere alǵan joq.
